Finss.az – Uşaqlar arasında peyvəndlənmə səviyyəsinin cüzi azalması belə, ictimai səhiyyəyə və iqtisadiyyata ciddi təsirlər göstərə bilər.

ABŞ-da aparılmış yeni elmi araşdırma bu məsələni gündəmə gətirib.

JAMA jurnalında dərc olunmuş tədqiqatda bildirilir ki, qızılca, məxmərək, poliomielit və difteriya kimi xəstəliklərə qarşı immunizasiyanın azalması nəticəsində yalnız ABŞ-da hər il 850 min nəfərdən çox insan qızılcaya yoluxa bilər. Əgər peyvəndləmə səviyyəsi 10 faiz daha da düşərsə, bu rəqəm 11 milyonu aşa bilər.

Qızılca xüsusilə təhlükəlidir – bir yoluxmuş şəxs 12-18 nəfəri yoluxdura bilər. Epidemiya riskinin qarşısını almaq üçün əhalinin azı 95 faizinin peyvənd olunması zəruridir. Lakin bir çox regionlarda bu göstərici həyəcanverici dərəcədə aşağıdır.

Araşdırma həm də bu prosesin iqtisadi yükünü vurğulayır. İnfeksion xəstəliklərin artması səhiyyə sisteminə təzyiqi artırır, sığorta xərclərini yüksəldir və valideynlər üçün əlavə maliyyə və sosial itkilərə səbəb olur.

Qızılcanın ağır nəticələri də var: hər beşinci uşaqda sətəlcəm, hər min nəfərdən birində isə beyin iltihabı baş verir. Ölüm halları isə 0,1–0,3% arasında dəyişir.

Mütəxəssislər əhalini peyvəndləmə səviyyəsini qorumağa çağırır və bunun yalnız tibbi deyil, həm də iqtisadi və sosial sabitlik üçün vacib olduğunu vurğulayırlar.