Bu gün bir neçə saat əvvəl "Həzi Aslanov-Dərnəgül" marşrutu üzrə hərəkət edən qatar "28 May" stansiyasında texniki nasazlıqla üzləşib. Hadisə zamanı bir vaqonun qapısında yaranan nasazlıq səbəbindən sərnişinlərin təhlükəsizliyini təmin etmək məqsədilə dərhal təxirəsalınmaz tədbirlər görülüb.

Bunu Fins.az-a açıqlamasında "Bakı Metropoliteni" QSC-nin mətbuat katibi Bəxtiyar Məmmədov deyib.

Mətbuat katibinin sözlərinə görə, metropolitenin normativ tələblərinə uyğun olaraq, sərnişinlərin qatarın içindən düşməsi zərurəti yaranıb:

“"28 May" stansiyasında olan sərnişin sıxlığı səbəbindən sərnişinlərin qatardan düşürülməsi prosesi 10 dəqiqə çəkib. Bu, sərnişinlərin təhlükəsizliyi baxımından xüsusi diqqət tələb edən bir vəziyyətdir.

Qatar daha sonra depoya göndərilib və vəziyyətin düzəldilməsi üçün dərhal ehtiyat qatarı stansiyaya yönləndirilib. Bununla yanaşı, metropolitenin xidmətləri arasında reyslərin planlaşdırılması və zamanla bağlı uyğun tədbirlər görülüb. Ümumilikdə, hər iki xətt üzrə qatarların intervalında əlavə 11 dəqiqə yubanma müşahidə olunub”.

B.Məmmədov onu da qeyd edib ki, Bakı Metropoliteni sərnişinlərin təhlükəsizliyini birinci sırada tutaraq, müntəzəm və etibarlı nəqliyyat xidmətinin göstərilməsi üçün bütün mümkün addımları atmaqdadır. Hadisənin araşdırılması və nasazlığın səbəblərinin müəyyən edilməsi üçün mütəxəssislər tərəfindən lazımi tədbirlər görüləcək:

“Sərnişinlərə verilən məlumatda, metropolitenin xidmətlərinə dair bütün sualların cavablandırılması üçün əlaqə kanallarının açıq olduğu bildirilib. Sərnişinlərin narahatlıqları üçün üzr dilənilib və xidmətlərin keyfiyyətinin artırılması üçün mütəmadi olaraq təhlil və qiymətləndirmə işlərinin aparılacağına söz verilib.

Bakı Metropoliteni, sərnişinlərin rahatlığı və təhlükəsizliyi üçün bütün lazımi tədbirləri görməyə davam edəcək”.

Fuad Mədətov
Fins.az