Yaponiya, Azərbaycanın Bakı Qlobal İqlim Şəffaflığı Platformasını dəstəkləyəcək. Bu məlumatı Yaponiyanın ətraf mühit nazirinin müavini Yutaka Matsuzava “İqlim şəffaflığı sahəsində Yüksək səviyyəli dialoq” tədbirində açıqlayıb.

Fins.az Matsuzavanın sözlərinə əsasən, xəbər verir ki, Yaponiya hər bir ölkəyə şəffaflığın artırılması istiqamətində dəstəyini davam etdirəcək. “Bu işlər BMT çərçivəsində həyata keçiriləcək və biz ən yaxşı təcrübələrimizi bölüşəcəyik. Ümumiyyətlə, iqlim dəyişikliyi ilə bağlı şəffaflıqla hərəkət etmək lazımdır,” – deyə nazir müavini vurğulayıb.

O, həmçinin Yaponiya hökumətinin iqlim dəyişikliyi ilə bağlı gələn il üçün hədəflərinin müəyyənləşməsində şəffaflıqdan yararlanacağını bildirib. Yaponiya, qlobal iqlim şəffaflığına olan töhfəsini artıraraq, beynəlxalq səviyyədə iqlim problemlərinə daha effektiv cavab verməyə çalışacaq.