Mayın 5-də Abşeron Logistika Mərkəzində Azərbaycan xalqının ümummilli lideri Heydər Əliyevin 100 illik yubileyi münasibətilə “Tarix yazan imza” adlı tədbir keçirilib.

Fins.az xəbər verir ki, tədbirdə Abşeron Logistika Mərkəzinin kollektivi, həmçinin Qaradağ Rayon İcra hakimiyyəti və Dövlət Gömrük Komitəsinin nümayəndələri ilə yanaşı bir sıra digər dövlət rəsmiləri də iştirak edib.

Tədbirin əvvəlində Azərbaycan Respublikasının Dövlət Himni səsləndirilib və Heydər Əliyevin zəngin və çoxşaxəli siyasi fəaliyyətinə həsr olunmuş video-çarxa baxıldıqdan sonra ümummilli liderin əziz xatirəsi bir dəqiqəlik sükutla yad edilib.

Tədbiri giriş sözü ilə açan Abşeron Logistika Mərkəzinin İdarə Heyətinin sədri Ziya Ağayev vurğulayıb ki, Heydər Əliyev Azərbaycan xalqının azadlıq və müstəqilliyi, ölkədə sabitliyin əldə olunmasında, Azərbaycanın dünya ölkələri arasında nüfuzunun yüksəldilməsində, dövlətçilik ənənələrinin formalaşdırılmasında, xalqının gələcəyi üçün geniş imkanlar yaradan liderdir. O, ümummilli liderin nəqliyyat-kommunikasiya infrastrukturunun inkişaf etdirilməsində, ölkəni xarici dövlətlərlə birləşdirən quru, dəniz, hava və dəmir yolu strukturlarının qurulmasında müstəsna rolundan söz açıb. O, zamanında qlobal prosesləri nəzərə alan Heydər Əliyevin Azərbaycanın beynəlxalq inteqrasiyası məsələsində vacib olan transmilli yükdaşımaya, nəqliyyat-kommunikasiya dəhlizlərinin yaradılması prosesinə xüsusi yanaşmasını vurğulayıb.

Daha sonra Azərbaycan Respublikası Milli Məclisinin depupatı Aydın Hüseynov və tədbirin digər iştirakçılarına söz verilib. Onlar da öz növbəsində Heydər Əliyevin bir çox sahələrdə bizə miras qoyduğu milli strategiyalardan və diplomatik uğurlardan danışıb.