“Ehtiyac meyarı ilə yaşayış minimumunun bərabərləşdirilməsi qarşımzda duran hədəflərdəndir. Artıq növbəti ilin dövlət büdcəsində buna nail olacağıq”.

“Fins.az” xəbər verir ki, bunu Milli Məclisin Gənclər və idman, Əmək və sosial siyasət, Aqrar siyasət, Regional məsələlər və Təbii ehtiyatlar, energetika və ekologiya komitələrinin birgə iclasında “Azərbaycan Respublikasının 2023-cü il dövlət büdcəsi haqqında” qanun layihəsinin müzakirəsi zamanı səslənən təklifinə əmək və əhalinin sosial müdafiəsi naziri Sahil Babayev bildirib.

Nazir qeyd edib ki, bunun ardıcıl olaraq təmin olunması qanunvericilik səviyyəsində də həll ediləcək: “Müvafiq normativ hüquqi aktlar da hazırlanacaq. Düşünürük ki, tədricən dövriyyədən ehtiyac meyarı anlayışı çıxarılacaq və fəaliyyət yaşayış minimumu üzərindən quralacaq”. 

Minimum pensiya məbləğinin artırılmasına münasibət bildirən nazir qeyd edib ki, bu, həyata keçirilən çoxşaxəli islahat planının tərkib hissəsidir: “2019-cu ildə minimum pensiya məbləği 160 manat idisə, bu gün həmin rəqəm 240 manatdır. Lakin bu məbləğ yeni pensiya alanlar üçündür. Birmənalı olaraq demək istəyirəm ki, minimum pensiya məbləğinin artırılması daim gündəlikdədir. Hökumət olaraq bu istiqamətdə ətraflı araşdırmalar aparılır, təkliflər hazırlanır”.