Finss.az - ABŞ iqtisadcısı Barry Eichengreen Financial Times qəzetindəki məqaləsində, ABŞ Prezidenti Donald Trampın siyasətinin dolların dünya valyutası kimi əsas rolunu itirməsinə səbəb ola biləcəyini bildirib.

Eichengreen, dolların güclü mövqeyinin ABŞ-ın dünya ÜDM-dəki payı və ABŞ maliyyə bazarlarının dərinliyi ilə izah edildiyini qeyd edib. Lakin, iqtisadçının fikrincə, bu günlərdə Trampın həyata keçirdiyi siyasət və onun digər ölkələrlə münasibətlərini zəiflətməsi, dolların hökmranlığını təhlükəyə atır.

İqtisadçı, dolların dünyadakı dominantlığının əsasən ticarət əlaqələri, beynəlxalq ittifaqlar və qlobal institutların möhkəmliyinə əsaslandığını vurğulayıb. Bu dövrün sona çatma riski olduğunu bildirən Eichengreen, Trampın digər ölkələrlə münasibətləri pozması və qarşılıqlılıq prinsipini zəiflətməsinin dolların sabitliyinə ciddi təhdid yaratdığını qeyd edib.

Onun fikrincə, Trampın siyasətləri nəticəsində dünya bazarında ABŞ-ın iqtisadi gücünə olan inam azalmağa başlayıb. ABŞ-ın dünya ixracatındakı payının azalması və gömrük rüsumlarının tətbiqi ilə vəziyyətin daha da pisləşəcəyi gözlənilir. Bundan əlavə, dolların saxlanması və ödəniş vasitəsi kimi cəlbediciliyi də azala bilər, çünki Trampın Federal Ehtiyat Sisteminin müstəqilliyini zəiflətməsi və müttəfiqlərlə əlaqələrin gərginləşməsi bu amilləri təsir edə bilər.

Eichengreen, dolların dünya iqtisadiyyatındakı dominantlıq statusunun uzun müddət davam etməsinin artıq təhdid altında olduğunu və Trampın siyasətinin bu durumu daha da kəskinləşdirdiyini qeyd edir.