2025-ci ilin yanvar-fevral aylarında Azərbaycanda beş həyat sığorta şirkəti vasitəsilə toplanan sığorta yığımlarının həcmi 103 milyon 640 min manata çatıb.

Finss.az Azərbaycan Mərkəzi Bankına istinadən xəbər verir ki, bu göstərici ötən ilin eyni dövrü ilə müqayisədə 28,9% artıb və ya 23 milyon 210 min manat çoxdur. 2024-cü ilin yanvar-fevral aylarında həyat sığorta şirkətləri 80 milyon 430 min manat sığorta haqqı toplaya bilmişdi.

Bu dövrdə yaşam sığortasının həyat sığortasında bazar payı 94,2%-ə yüksəlib, ötən ilin eyni dövründə isə bu göstərici 92,4% olub.

Cari ilin ilk 2 ayında həyatın yaşam sığortası üzrə ödənişlər 15,6% artaraq 68 milyon 902 min manata çatıb. Ötən ilin ilk 2 ayında bu sığorta növü üzrə ödənişlər 59 milyon 618 min manat təşkil etmişdi.

Qeyd edək ki, həyatın yaşam sığortası yığımları adətən 3-5 illik dövrü əhatə edir. Əmək haqqının bir hissəsini hər ay həyatın yaşam sığortasına yönəldən işçilər müqavilənin sonunda əlavə edilmiş faizlə yanaşı, hər ay ödənilən vergi və sosial sığorta ödənişlərini geri ala bilirlər.

Fuad Mədətov
Finss.az