Azərbaycanda dövlət dəstəyi ilə tətbiq edilən aqrar sığortaya xüsusilə heyvandarlıq təsərrüfatlarının marağı artmaqdadır.

Fins.az xəbər verir ki, kənd təsərrüfatı heyvanlarının və meyvə bağlarının sığortası, bu sahədəki yeniliklər və fermerləri maraqlandıran məsələlər Aqrar Sığota Fondu və Samux Rayon icra hakimiyyətinin təşkilatçılığı ilə keçirilən «Dayanıqlı fermer təsərrüfatı üçün aqrar sığorta» tədbirində müzakirə edilib.

Tədbiri giriş sözü ilə açan rayon icra hakimiyyəti başçısının müavini, sosial-iqtisadi inkişafın təhlili və proqnozlaşdırması şöbəsinin müdiri Arif Ağayev Samuxda kənd təsərrüfatı üçün böyük imknalar olduğunu, xüsusilə çoxsaylı heyvnadarlıq təsərrüfatlarının mövcul olduğunu, eləcə də son illər meyvə bağlarının salındığınıü bildirib.

Tədbirdə bildirilib ki, Samux rayonundakı 25,6 min hektar əkin sahəsinin 10,7 min hektarı taxıl əkinləri, qalan hissə isə digər bitkilərin əkini üçün istifadə olunur. Rayonda əkin sahələrinin 8,8 min hektarı sığortalanıb. 

A.Ağayev təsərrüfatların qorunması üçün aqrar sığortanın əhəmiyyətini qeyd edərək fermerləri bu imkandan istifadə etməyə çağırıb.

Aqrar Sığorta Fondunun idarə heyətinin üzvü Roman Əmircanov aqrar sığotrta mexanizmi, onun əhatə etdiyi məhsullar və risklər barədə məlumat verib, onun sözlərinə görə, sığorta haqqının 50%-nin dövlət tərəfindən ödənilməsi sayəsində fermerlər  cüzi məbləğ ödəməklə təsərrüfatlarını müxtəlif risklərdən sığorta edə bilərlər.

Fondun idarə heyətinin üzvü, aqrar sığortanın xüsusilə son dövrlər Samuxda geniş salınan meyvə  - şaftalı, nektarin, ərik və sair bağları üçün mühüm olduğunu qeyd edərək bildirib ki, təsərrüfatlar yeni salınan bağların tingini, ağacları və toplanacaq məhsulu sığorta edə bilərlər.

Görüşdə keçirilən təqdimatda bildirilib ki, 660 ting olan 1 hektarlıq sahədəki tinglərin qorunması cəmi 14-15 manata, ildə 20 manatlıq məhsul verən meyvə ağaclarının sığortası isə fermerlərə 30-40 qəpiyə başa gəlir.

Xatırladaq ki, Samux rayonunda çoxsaylı heyvandarlıq təsərrüfatları da var. Hazırda rayonda 23,7 min iri buynuzlu, 123 min xırdabuynuzlu olmaqla, ümumilikdə 146,7 min kənd təsərrüfatı heyvanı var.

Bildirilib ki, qaydalara edilən dəyişikliyə əsasən heyvnaların sığorta tarifləri aşağı salınıb, nəticədə 1000 manatlıq mal-qaranı (inək, camış və sair) cəmi 26 manata, 300 manat qiyməti olan xırdabuynuzlu heyvanı (qoyun və keçi) cəmi 7,8 manata sığorta etmək mümkündür.

Tədbirdə bildirilib ki, sığortalanmaq üçün heyvanlar qeydiyyatdan keçirilməli və müvafiq qaydada birkalanmalıdır.

Aqrar sığorta barədə məlumat fermerlərin böyük marağına səbəb olub. İştirakçılar taxıl və meyvə bağlarının sığortası, eləcə də kənd təsərrüfatı heyvanlarının sığortası ilə bağlı Aqrar Sığorta Fondu nümaynədələrinə çoxsaylı suallar ünvanlayıb, təkliflər səslindəriblər. Bütün suallara ətraflı cavablar verilib.

Aqrar sığortanın əhatə etdiyi məhsullar və risklər, eləcə də sığorta haqları barədə ətraflı məlumatı  Aqrar Sığorta Fondunun www.asf.gov.az rəsmi internet səhifəsindən və səhifədəki “Bitkiçilik sığortası kalkulyatoru” və “Heyvandarlıq sığortası kalkulyatoru” vasitəsilə əldə etmək mümkündür. Fermerlər həmçinin Fondun 1651 çağrı mərkəzinə zəng etməklə, aqrar sığorta barədə məlumat ala, təsərrüfatlarını sığortalaya bilərlər.

Fuad Mədətov
Fins.az