Fins.az - Dünyanın ən böyük neft ixracatçısı olan Səudiyyə Ərəbistanı, yanvar ayında Asiya bazarları üçün neft qiymətlərini son illərin ən aşağı səviyyələrinə endirməyi planlaşdırır. Reuters-in xəbərinə görə, yanvar ayı üçün Arab Light markalı neftin rəsmi satış qiyməti (OSP) dekabrla müqayisədə bir barel başına 70-90 sent azalacaq. Bu, son 4 ilin ən aşağı qiyməti olacaq.

Qiymətlərin azalması, noyabr ayında Dubay bazarlarında birinci və üçüncü aylara olan qiymət fərqinin daralması və Yaxın Şərq neft növlərinə olan zəif tələblə əlaqələndirilir. Keçən ay, yanvar yükləməli Yaxın Şərq neftinin spot mükafatları da əvvəlki aydan təxminən yarıbayarı azalmışdı.

Bəzi analitiklər, daha ağır növlər, xüsusən də Arab Medium və Arab Heavy üçün qiymətlərin daha əhəmiyyətli şəkildə azalmasını proqnozlaşdırır, çünki mazut marjaları zəifləyib. Xüsusilə Çindəki aşağı emal marjaları ağır növlər üçün qiymət endirimlərini dəstəkləyir.

Səudiyyə Ərəbistanının neft qiymətlərinə təsir edəcək əsas amil isə 5 dekabrda keçiriləcək OPEC+ görüşüdür. Bu görüşün nəticələri 2025-ci ilin əvvəlində təchizat həcmlərini müəyyən edəcək və qiymətlərə təsir göstərə bilər.

Səudiyyə Ərəbistanının dövlət neft şirkəti Saudi Aramco-nun qiymətləri, OPEC+ görüşünün yekunlarına əsasən açıqlaması gözlənilir.