“OPEC+” (OPEC və təşkilata daxil olmayan ölkələri əhatə edən neft istehsalının azaltması üzrə təşəbbüs - red.) razılaşmasında iştirak edən ölkələrin neft hasilatını azaltmaq qərarı sırf iqtisadi xarakter daşıyır və üzv dövlətlər tərəfindən yekdilliklə qəbul edilib.

Mətbuata istinadən verdiyi məlumata görə, bu barədə Səudiyyə Ərəbistanının xarici işlər naziri Faysal bin Farhan bildirib.

Məlumata görə, “OPEC+” ölkələri keçən həftə avqust ayı üçün razılaşdırılmış səviyyələri əsas götürərək, noyabr ayından gündəlik neft hasilatını 2 mln. barel azaltmağa qərar verib. Ağ Evin mətbuat katibi Karin Jan-Pyer bir müddət əvvəl bildirmişdi ki, ABŞ Səudiyyə Ərəbistanı ilə münasibətləri nəzərdən keçirir və prezident Co Bayden onların dəyişdirilməsinə ehtiyac olduğunu düşünür. Vaşinqton “OPEC”ın noyabr ayından neft hasilatını azaltmaq qərarına lobbiçilik etməkdə Səudiyyə hakimiyyətini günahlandırır, Amerika tərəfinin bunu etməmək çağırışına baxmayaraq, bunu Rusiyaya dəstək kimi görür.

"OPEC+ sazişində iştirak edən ölkələr məsuliyyətlə hərəkət edib, müvafiq qərar qəbul ediblər. OPEC+ qərarı sırf iqtisadi xarakter daşıyır, bu, ölkələr tərəfindən yekdilliklə qəbul edilib. Onlar bazarı sabitləşdirməyə, istehsalçı və istehlakçıların maraqlarını təmin etməyə çalışırlar", - Faysal bin Farhan bildirib.

“Krallığın Vaşinqtonla münasibətləri strateji xarakter daşıyır və regionda təhlükəsizlik və sabitliyin qorunmasına yönəlib, Ər-Riyad və Vaşinqton arasında hərbi əməkdaşlıq isə hər iki ölkə üçün faydalıdır”, - nazir əlavə edib.

(c)APA