Azərbaycanın bütün şəhər və rayonları bank şəbəkəsi ilə eyni səviyyədə əhatə olunmayıb. Fins.az-ın bu sahədə apardığı araşdırma nəticəsində məlum olub ki, banklar iri şəhərlərə can atırlar. Bəzi rayonlarda isə vətəndaşlar cəmi 1 bankın xidmətindən istifadə etməyə məcburdur.

Sirr deyil ki, bank bolluğu ən çox Bakıdadır. Səbəbi çox sadədir. İlk növbədə ölkədəki 43 bankdan 41-ni baş ofisi paytaxtda yerləşir. Üstəlik regional banklar – baş ofisi Gəncədə olan “Gəncəbank” və Naxçıvandakı “Naxçıvanbank” da Bakıda filiallarını açıblar.

Ölkənin digər şəhərlərinə gəlincə, Gəncədə bankların sayı 33, Sumqayıtda 29, Lənkəranda 17, Şəmkirdə 14, Bərdə və Xaçmazda 13, Şəkidə 12, Şirvanda 11, Abşeron, İmişli, Masallı, Mingəçevir və Zaqatalada isə 10-dur. Bu bölgələr iqtisadi cəhətdən aktiv olduğuna görə bankların buralara can atması başa düşüləndir.

İşğal altında olan şəhər və rayonları nəzərə almasaq, bəzi ucqar rayonlara banklar ümumiyyətlə maraq göstərmirlər. Məsələn, Ağdam, Babək, Balakən, Daşkəsən, Gədəbəy, Göygöl, Hacıqabul, Xızı, Kəngərli, Qobustan, Lerik, Oğuz, Ordubad, Sədərək, Samux, Şahbuz, Tərtər, Yardımlı, Zərdab rayonlarında cəmi 1 bank fəaliyyət göstərir. Bu, bütün ölkə üzrə filial şəbəkəsinə malik olan “Kapital Bank”dır.