Azərbaycan Mərkəzi Bankının (AMB) valyuta ehtiyatları tarixində ən yüksək həddə ötən ilin iyul ayının yekununda çatıb. Fins.az-ın məlumatına görə, həmin vaxt ehtiyatların məbləği 15 milyard 193,4 milyon ABŞ dollar olub. Bundan sonra, valyuta ehtiyatları azalmağa başlayıb. 2015-ci ilin yanvar ayının yekununa görə isə, ehtiyatların həcmi 12 milyard 680,6 milyon dollar olub. Başqa sözlə, son 6 ayda ehtiyatlar 16,5%, və ya hər ay orta hesabla 419 milyon dollar azalıb.

Xatırladaq ki, AMB-nin valyuta ehtiyatlarının azalması ölkədə ABŞ dollarına tələbatın artması ilə bağlıdır. AMB daxili bazarda dolların bahalaşmasının qarşısını almaq üçün öz ehtiyatlarından istifadə edir. Təkcə son iki ayda (dekabr-yanvar aylarında) manatın ucuzlaşmasının qarşısını almaq Mərkəzi Banka 2 315 milyon dollara başa gəlib.