İşğaldan azad edilmiş ərazilərdə Qarabağ Dirçəliş Fondunun maliyyə dəstəyi ilə müxtəlif layihələr icra olunur.

Fins.az-ın məlumatına görə, Fondun İdarə Heyətinin sədri Rəhman Hacıyev jurnalistlərə açıqlamasında bu layihələrin əksərinin digər dövlət qurumlarının sifarişi ilə həyata keçirildiyini və Fond tərəfindən maliyyələşdirildiyini bildirib.

Prezident İlham Əliyevin göstərişi ilə Ağdamda imarət kompleksinin yenidənqurma və bərpası, Şahbulaq qalasının ətrafında turizm infrastrukturunun qurulması kimi önəmli layihələr maliyyə dəstəyi ilə həyata keçirilir. Füzuli şəhərində isə böyük mərkəzi parkın salınması və onun ərazisində müxtəlif obyektlərin, restoranların, oyun və idman meydançalarının tikintisi üçün hazırlıq işləri gedir.

Bundan əlavə, Şuşa şəhərində qədim Karvansaray və muzey binasının bərpası, Füzuli və Zəngilan rayonlarında ekologiya ilə bağlı layihələr də Fondun dəstəyi ilə icra olunur. Fond, həmçinin Mədəniyyət Nazirliyi ilə birlikdə Qarabağda memorial komplekslərin yaradılması layihələrinə də maliyyə dəstəyi ayırmağa başlayır.

Bu layihələr regionun dirçəlişi və turizm potensialının inkişafı üçün vacib addımlar kimi qiymətləndirilir.

Fuad Mədətov
Fins.az