Finss.az - 2025-ci ilin ilk yarısında neft qiymətləri böyük volatillik nümayiş etdirərək son aylarda hasilatın gəlirliliyini təhlükə altına alan səviyyəyə qədər kəskin azalıb.

Bu barədə Business Insider portalı Quantum Capital Group-un icraçı vitse-prezidenti Dvayt Skottun açıqlamalarına istinadən məlumat yayıb.

Skott bildirib ki, hazırkı qiymətlər yeni qazma işlərinə yatırılan sərmayənin adekvat gəlir gətirmədiyi səviyyəyə yaxınlaşıb. ABŞ-da fəaliyyət göstərən qazma qurğularının sayı artıq ikinci ay ardıcıl azalır ki, bu da hasilatın yaxın gələcəkdə stabilliyinə dair suallar yaradır.

İlin əvvəlindən bəri ABŞ-da xam neftin qiyməti təxminən 8% azalıb və 2025-ci ilin iyul ayının ortalarında barrel başına 66,68 dollar civarında ticarət olunub. Bu azalma fonunda bir çox neft şirkətləri yeni quyulara sərmayə yatırmaqda ehtiyatlı davranır.

Skott, Donald Trampın keçmişdə səsləndirdiyi “qaz, uşaq, qaz” çağırışının artıq effektivliyini itirdiyini vurğulayıb. Son illərdə ABŞ neft hasilatı rekord həddə çatdığı üçün istehsalçılar bazarda təklif artımının qiymətləri daha da aşağı sala biləcəyindən ehtiyatlanırlar.

İnvestorun fikrincə, qiymətlərin düşməsində Tramp administrasiyasının tətbiq etdiyi tariflər ətrafındakı qeyri-müəyyənlik mühüm rol oynayır. Buna baxmayaraq, Skott bu azalma dalğasının müvəqqəti olduğunu və ABŞ-ın dünya enerji bazarında aparıcı istehsalçılardan biri olaraq mövqeyini qoruyacağını proqnozlaşdırır.