Finss.az -  Çinin avtomobil nəhəngi BYD zəifləyən tələbat fonunda elektromobil modellərinə 35%-dək endirim elan edib.

Bu addım dərhal bazarda əks-səda doğurub – aparıcı Çin elektromobil istehsalçılarının səhmləri sürətlə ucuzlaşıb.

BYD-nin öz səhmləri 8,3% azalıb, Li Auto, Great Wall Motor və Geely kimi digər istehsalçıların səhmlərində də 5%-dən çox geriləmə müşahidə olunub. Eyni zamanda Çin dilerlərinin anbar ehtiyatları rekord həddə çatıb – 3,5 milyon ədəd elektromobil, bu isə 2023-cü ilin dekabrından bəri ən yüksək göstəricidir.

Morgan Stanley analitiklərinin fikrincə, BYD-nin aprel ayından etibarən tətbiq etdiyi bəzi endirimlərin rəsmi elan olunması, bazarda alıcı marağının zəifliyini və rəqabətin intensivliyini göstərir.

Şirkət xüsusilə köhnə modelləri satışa çıxarır. Seagull modelinin qiyməti 20% endirimlə 7 780 ABŞ dolları, Seal modelinin isə 34% endirimlə 14 300 ABŞ dolları təşkil edir.

Citi Research bildirir ki, bu təşəbbüs digər istehsalçıları da qiymətləri aşağı salmağa vadar edəcək. Məsələn, Chongqing Changan artıq Deepal S07 modelinə 25 000 yuan endirim təklif edib. Leapmotor isə C16 və C11 krossover modellərinin qiymət siyasətini yenidən nəzərdən keçirib.

Citi-nin hesablamalarına əsasən, BYD-nin endirim kampaniyası satış nöqtələrində alıcı axınını 30–40% artırıb. Bu temp davam edərsə, şirkət may ayında da güclü nəticələr əldə edə və 2025-ci il üzrə 5,5 milyon ədədlik satış hədəfinə daha da yaxınlaşa bilər.