Dividend, adətən, maliyyə ilini xalis mənfəətlə başa vuran səhmdar cəmiyyət tərəfindən səhmdarların ümumi yığıncağının (SÜY) qərarı əsasında ödənilir.

Bu barədə "ABB İnvest İnvestisiya Şirkəti" QSC-nin Biznesin İnkişafı departamentinin direktoru Elçin Məmmədov Finss.az-a açıqlamasında bildirib.

Onun sözlərinə görə, səhmdarlar SÜY-də il ərzində əldə edilmiş xalis mənfəətin tam şəkildə və ya bir hissəsinin dividend formasında bölüşdürülməsi barədə qərar qəbul edirlər. Daha sonra hər bir səhmdar şirkətin nizamnamə kapitalında malik olduğu paya uyğun şəkildə ümumi vəsaitdən öz dividendlərini alır.

E.Məmmədov qeyd edib ki, bu qaydalar əsasən adi səhmlərə aiddir:

“Əgər şirkət adi səhmlərlə yanaşı, imtiyazlı səhm də buraxıbsa, bu zaman imtiyazlı səhm sahiblərinə ödənilən illik dividend xalis mənfəətdən deyil, həmin səhmlərin buraxılış şərtlərində göstərilən faiz nisbətindən asılı olur. Bu faiz səhmin nominal dəyərinə tətbiq edilir və illər üzrə dəyişməyərək sabit qalır. Hətta şirkət maliyyə ilini zərərlə başa vurarsa belə, adi səhm sahiblərindən fərqli olaraq, imtiyazlı səhm sahiblərinə həmin qaydada dividend ödənilməlidir”.

Fuad Mədətov
Finss.az