Sığorta müasir dövrdə böyük önəm daşıyan maliyyə sahələrindən biri hesab edilir. Risk həyatımızın ayrılmaz hissəsi olduğundan, gözlənilməz hadisələr nəticəsində yaranan maddi zərərlərin kompensasiya edilməsi sığorta vasitəsilə mümkündür.
Bu barədə “AtaSığorta” Açıq Səhmdar Cəmiyyətinin Anderraytinq və Təkrarsığorta Departamentinin direktoru Arif Əjdərov Finss.az-a açıqlamasında bildirib.
Onun sözlərinə görə, sığortalanmaq yalnız fiziki şəxslərin deyil, həm də hüquqi şəxslərin məruz qala biləcəyi maliyyə itkilərindən qorunmasına imkan yaradır.
A.Əjdərov Azərbaycanda biznes sığortasının vəziyyəti və bu sahəyə daxil olan sığorta növləri barədə danışıb:
"Biznes sığortası sahibkarlıq fəaliyyəti ilə məşğul olan şəxslərin sığorta hadisələri nəticəsində üzləşə biləcəyi risklərdən qorunmasını təmin edir. Davamlı iqtisadi inkişaf fonunda sahibkarların sığortaya marağı artmaqdadır. Hər bir sahibkarın iş fəaliyyətində sığorta mühüm rol oynayır."
Azərbaycan sahibkarlarının daha çox üstünlük verdiyi və geniş istifadə olunan könüllü biznes sığortası növləri aşağıdakılardır:
Üçüncü Şəxslər Qarşısında Mülki Məsuliyyət Sığortası
Bu sığorta növü, baş verən sığorta hadisəsi nəticəsində üçüncü şəxslərin həyatına, sağlamlığına və əmlaklarına dəymiş itki və ziyana görə sığortalının üçüncü şəxslər qarşısında məsuliyyətinə və ona qarşı irəli sürülən iddia və tələblərə Azərbaycan Respublikasının qanunvericiliyinə müvafiq olaraq təminat verir.
İşəgötürənin Məsuliyyət Sığortası
Bu sığorta növü, sığortalının göstərdiyi fəaliyyət nəticəsində yerinə yetirilən işlərdən yaranan, əmək prosesi zamanı və bu prosesin nəticəsində baş verən ölüm və bədən xəsarətləri ilə əlaqədar sığortalının öz işçiləri qarşısında Azərbaycan Respublikasının Əmək Məcəlləsi və müvafiq qanunvericilik aktlarına əsasən məsuliyyətini sığortalayır.
İnşaat-Montaj Sığortası
Bu sığorta növü, sığorta müqaviləsinə daxil olan əmlaklara, tikinti üçün istifadə olunan avadanlıqlara və qurğulara, tikinti sahəsində olduqları və tikinti işləri aparıldığı zaman, əvvəlcədən bilinməyən və gözlənilməz səbəblərdən yaranan zərərlərə təminat verir.
Əmlakın Yanğından və Digər Risklərdən Sığortası
Bu sığorta növü ilə sahibkarlara məxsus daşınmaz əmlaklara (ofis, müəssisə, anbar, təsərrüfat obyekti və s.) və onların daxilində yerləşən daşınar əmlaklara dəymiş zərər üçün sığorta təminatı verilir. Sahibkarlar müvafiq sığorta növü vasitəsilə yanğın, ildırım vurması, partlayış, sel və su basması, daşqın, daxili su sızması və digər risklər üzrə təminat əldə edirlər.
Yüklərin Sığortası
Bu sığorta növü ilə sahibkarlıq fəaliyyəti üçün əldə olunan yüklərin nəqliyyat vasitəsi ilə ölkə daxilində və xaricində daşınması zamanı sığorta təminatı verilir. Təminat hər hansı bir hadisə nəticəsində yükün tam və ya qismən məhv olmasını və ya zədələnməsini əhatə edir.
Nəqliyyat Vasitələrinin Kasko Sığortası
Bu sığorta növü ilə sahibkarlara məxsus nəqliyyat vasitələrinin sığortalanması həyata keçirilir. Kasko sığortası, sahibkarların maraq dairəsində olan daha geniş sığorta növlərini əhatə edir. Bu sığorta növü yol-nəqliyyat hadisəsi, hər hansı bir obyektlə toqquşma, üçüncü şəxslərin qərəzli hərəkətləri, yanğın, partlayış, ildırım vurması, oğurluq, soyğunçuluq, sel, daşqın, su basması və s. risklər üzrə təminat verir.
Dəzgah Sınması Sığortası
Bu sığorta növü, əsasən istehsal sahəsində fəaliyyət göstərən sahibkarlarla bağlanır. Sığorta predmetinə dəzgahlar və qurğular daxildir. Müvafiq dəzgah və qurğuların istifadəsi zamanı baş verən sığorta hadisəsi nəticəsində yaranan maddi zərərlər üzrə təminat verilir. Sığorta riskləri iş qəzaları, elektrik enerjisinin təsiri nəticəsində yaranan qısa qapanma, yanıb-sönmə, cərəyan yükünün artması, işçi heyəti və ya üçüncü şəxslərin kobud səhvləri nəticəsində meydana gələn zərərləri əhatə edir".
Beləliklə, biznes sığortası sahibkarların fəaliyyətinin təhlükəsizliyini təmin edərək onların maliyyə risklərini minimuma endirir. Müxtəlif risklərdən qorunmaq və mümkün itkilərin qarşısını almaq üçün sahibkarların uyğun sığorta məhsullarından istifadə etməsi vacibdir.
Fuad Mədətov
Finss.az