Finss.az - 2025-ci ilin yanvar-fevral aylarında Azərbaycanda sahibkarlıq fəaliyyətini dəstəkləmək məqsədilə verilən güzəştli kreditlərə olan tələbat artıb.

Sahibkarlığın İnkişafı Fondunun məlumatına görə, bu dövrdə maliyyələşdirilən layihələrin 96,5 faizi regionlarda fəaliyyət göstərən sahibkarlıq subyektlərinə aiddir. Bununla yanaşı, verilən kreditlərin ümumi məbləğinin 75 faizi də regionlardakı sahibkarlara yönəldilib.

Cari ilin ilk iki ayında 547 layihə maliyyələşdirilib və bu layihələrə 32,1 milyon manat güzəştli kredit ayrılıb. Güzəştli kreditlər hesabına 500-dən çox yeni iş yerinin yaradılması nəzərdə tutulur. Əlavə olaraq, maliyyələşdirilən layihələrin 99,6 faizi mikro, kiçik və orta sahibkarlıq subyektlərinə məxsus olub.

Verilən kreditlər əsasən prioritet sahələrdə fəaliyyət göstərən sahibkarlıq subyektlərinin inkişafına yönəldilib. Kreditlərin ümumi məbləğinin 40,5 faizi kənd təsərrüfatı sahəsinə, 56 faizi sənaye sahəsinə (o cümlədən aqrar emal), 3,5 faizi isə digər sahələrə yönəldilib. Bu dəstək proqramı, ölkə iqtisadiyyatının müxtəlif sahələrində inkişafı stimullaşdırmaq və yeni iş yerlərinin yaradılmasını dəstəkləmək məqsədini güdür.