Finss.az - Bu gün Çin ABŞ mallarına qarşı yeni tariflər və ticarət məhdudiyyətləri tətbiq etdiyini elan edib.

Bu addım ABŞ-ın Çin mallarına tarifləri 20%-ə qədər artırmasına cavab olaraq atılıb.

Çinin Maliyyə Nazirliyi açıqlamasında bildirib ki, ABŞ-dan idxal edilən toyuq, buğda, qarğıdalı və pambığa 15%, soya fasulyəsi, sorqo, donuz əti, mal əti, meyvə-tərəvəz və süd məhsullarına isə 10% tarif tətbiq ediləcək.

Bundan əlavə, Çinin Ticarət Nazirliyi 15 ABŞ şirkətini ixrac nəzarəti siyahısına daxil edib və 10 ABŞ firmasını etibarsız şirkətlər siyahısına salıb. Bu tədbirlər 10 martdan qüvvəyə minəcək.

Çin tərəfindən hədəfə alınan şirkətlərdən biri də Illumina Inc olub. Bu şirkət artıq gen sekvensiya avadanlıqlarını Çinə ixrac edə bilməyəcək.

Bu addımlar Pekinin ABŞ-ın ticarət siyasətinə sərt cavabı kimi qiymətləndirilir. Xatırladaq ki, ABŞ-ın keçmiş prezidenti Donald Tramp fevral ayında Çin mallarına qarşı 10%-lik tarif tətbiq etmişdi. Pekin buna öz tarifləri və ixrac məhdudiyyətləri ilə cavab vermişdi.

Ticarət gərginliyi Vaşinqton və Pekin arasında yeni bir müharibə dalğasına səbəb olub. Tramp administrasiyası bu tariflərin əsas məqsədinin Çindən gələn qanunsuz maddələrin, xüsusilə fentanilin, ABŞ-a axınının qarşısını almaq olduğunu bildirib. O, eyni zamanda Kanada və Meksikaya qarşı da 25%-lik tariflər tətbiq edib.

Son aylarda ABŞ və Çin yeni ticarət razılaşması üzrə danışıqlara maraq göstərdiklərini açıqlayıblar. Lakin Tramp administrasiyasının son tarif qərarları bu danışıqları çətinləşdirə bilər.

Bu tarif artımları Çində bu həftə keçiriləcək yüksək səviyyəli hökumət iclasından əvvəl elan edilib. Gözlənilir ki, Çin hökuməti öz iqtisadiyyatını qorumaq üçün əlavə tədbirlər görəcək.