Finss.az - 2025-ci ilin ilk altı ayında xarici şirkətlər Rusiyada fəaliyyətlərinin qeydiyyatı üçün müraciətlərin sayı 2024-cü ilin bütün illik göstəricisindən iki dəfə çox olub.

Kokoc Group-un araşdırmasına görə, bu müddətdə 3 minə yaxın ərizə təqdim edilib, halbuki ötən il 1650 ərizə qeydə alınmışdı.

Ən fəal ölkələr arasında Hindistan liderdir — 1000-dən çox müraciət ilə. Çin şirkətləri 800-dən çox, Türkiyə biznesi isə 150-dən çox ərizə ilə sıralamada ön yerdədir. Bundan başqa, Afrikadan və Fars körfəzi ölkələrindən olan şirkətlər də Rusiyada biznes qururlar.

“TeDo” konsultasiya şirkətinin ekspertləri bildirir ki, Rusiyada 9 mindən çox Çin şirkəti fəaliyyət göstərir, əsasən IT, texnologiya və mühəndislik sahələrində.

Bu artım aşağı rəqabət, geniş bazar və qərb proqram təminatına məhdudiyyətlər kimi səbəblərlə əlaqələndirilir. IT sektorunun nümayəndələri artan müraciətləri rus biznes sektoruna marağın bərpası kimi qiymətləndirir.

Lakin Content AI-nin məsləhətçisi Oleg Sajin qeyd edir ki, qərb tərəfdaşlarının kəskin çıxışı nəticəsində yaranan etimadsızlıq yeni oyunçular üçün çətinliklər yarada bilər. Dövlət sifarişçilərinin yerli proqram təminatından istifadə tələbi isə əlavə məhdudiyyətlər gətirir.