Finss.az - Rəqəmsal İnkişaf və Nəqliyyat Nazirliyinin (RİNN) tabeliyindəki İnformasiya Kommunikasiya Texnologiyaları Agentliyi (İKTA) 2025-ci ilin I rübü üçün internet xidmətləri ilə bağlı şikayətlərin indeksi və şikayətlərin orta cavablandırılma müddəti haqqında hesabatını dərc edib.

Hesabatda “E-Şikayət” sistemi vasitəsilə 2025-ci ilin I rübü ərzində internet operator və provayderlərinə ünvanlanmış müraciətlərlə bağlı statistikalar təqdim edilib. Şikayət indeksi və indeks üzrə dinamika, 2024-cü ilin IV rübü ilə müqayisə olunaraq operator və provayderlərin şikayətlərə necə cavab verdiyi qiymətləndirilib.

Şikayətlərin cavablandırılma müddəti ilə bağlı məlumatlar da diqqətə çatdırılıb. Bu göstərici, "E-Şikayət" sisteminə daxil olan müraciətlərin telekommunikasiya operator və provayderləri tərəfindən icra müddətini əks etdirir. Hesabata əsasən, bazar payının 90%-ni təşkil edən şirkətlər tərəfindən daxil olan müraciətlərdən əldə edilən nəticələr formalaşdırılıb.

Ən yüksək şikayət indeksi olan provayderlər sırasında "Uplink" MMC (8.56), "GSP" MMC (6.10), "Selnet" MMC (5.31), "Eurosel" MMC (2.89), "Fibernet" MMC (2.69) yer alıb.

Ortalama cavablandırma müddətinə gəldikdə isə, ən uzun cavablandırma müddətinə malik şirkətlər arasında "Uplink" MMC (30 gün), "Konnekt" QSC (13 gün), "Aztelekom" MMC (12 gün), "Uninet" MMC (11 gün) və "Fibernet" MMC (11 gün) ilk sıralarda yer alıb.

Qeyd edək ki, "E-Şikayət" sistemi 2023-cü ilin noyabr ayında istifadəyə verilib və bu günə qədər 6000-ə yaxın müraciət daxil olub.

Bu hesabat, internet xidmətlərinin keyfiyyətinin yaxşılaşdırılması üçün əhəmiyyətli məlumatlar təqdim edir və vətəndaşların şikayətlərinə necə yanaşıldığını göstərir.