Finss.az xəbər verir ki, Qazaxıstan Süni İntellekt və Rəqəmsal İnkişaf Nazirliyi ilə Oracle şirkəti arasında süni intellekt, yüksək performanslı hesablama və bulud texnologiyaları sahələrində əməkdaşlığın genişləndirilməsini nəzərdə tutan anlaşma memorandumu imzalanıb.

Nazirliyin mətbuat xidmətinin məlumatına görə, memorandumun məqsədi Oracle həllərinin Qazaxıstanda pilot süni intellekt infrastrukturu kimi tətbiqinin qiymətləndirilməsi, sınaqların aparılması, həmçinin bulud məlumat mərkəzlərinin mərhələli inkişaf potensialının öyrənilməsi və tətbiqi süni intellekt sahəsində pilot layihələrin həyata keçirilməsidir.

Bəyanatda qeyd olunur ki, Oracle şirkəti bu təşəbbüslərin icrasında Qazaxıstan hökumətinə texniki və məsləhət dəstəyi göstərəcək. Bundan əlavə, tərəflər ixtisaslaşmış təlim və sertifikatlaşdırma proqramları, insan resurslarının inkişafı, birgə tədqiqat layihələri və Qazaxıstanda Oracle Kompetensiya Mərkəzinin yaradılması istiqamətində də əməkdaşlıq etməyi planlaşdırırlar.

Bu addım Qazaxıstanın rəqəmsal transformasiya və süni intellekt strategiyasının həyata keçirilməsində mühüm mərhələ kimi qiymətləndirilir.