Finss.az - Çinin Dövlət Statistika İdarəsinin (DSİ) məlumatına görə, 2025-ci ilin yanvar-fevral aylarında ölkədə sənaye istehsalı illik hesabla 5,9% artıb.

Bu, dekabr ayındakı 6,2%-lik artım ilə müqayisədə azalma göstərir. Analitiklər isə daha güclü bir yavaşlama gözləyirdilər və orta hesabla 5,3% artım proqnozlaşdırmışdılar.

İstehsalın sektorlar üzrə müsbət göstəriciləri müşahidə edilib. Emal sənayesi 6,9% artım göstərərkən, mineralçıxarma sahəsində 4,3%, neft və qaz sektorunda isə 0,9% artım qeydə alınıb. Rəngli metalların istehsalı 6,6%, kompüter və rabitə avadanlıqları istehsalı isə 10,6% artıb. Avtomobil istehsalı isə 12% yüksəlib. Ümumilikdə, 41 sektordan 36-sında artım müşahidə edilib.

Pərakəndə satışlar da artıb. Yanvar-fevral aylarında illik artım 4% olub. Geyim və ayaqqabı satışı 3,3%, kosmetika 4,4%, ərzaq məhsulları isə 11,5% artıb. İdman və əyləncə malları satışları isə 25% yüksəlib. Lakin alkoqolsuz içkilər və avtomobil satışı müvafiq olaraq 2,6% və 4,4% azalıb.

İnvestisiyalar da artıb, əsas aktivlərə qoyulan investisiyalar 4,1% artaraq 5,26 trilyon yuan (734 milyard ABŞ dolları) olub. İnfrastruktur və emal sənayesi üzrə investisiyalar sırasıyla 5,6% və 9% artıb. Daşınmaz əmlaka investisiyalar isə 9,8% azalıb.

Fevral ayında işsizlik nisbəti 5,4%-ə yüksəlib, bir əvvəlki ayda isə 5,2% idi. Analitiklər işsizlik səviyyəsinin 5,1% olacağını proqnozlaşdırırdılar.