Finss.az - Beynəlxalq Valyuta Fondunun (BVF) rəhbəri Kristalina Georgieva, dünya iqtisadiyyatında ABŞ-ın iqtisadi siyasətindəki əhəmiyyətli dəyişikliklərdən irəli gələn qeyri-müəyyənliyin qorunub saxlanıldığını bəyan edib.

Onun sözlərinə görə, bu dəyişikliklər ticarət, vergi siyasəti, dövlət xərcləri, deregulyasiya, miqrasiya və kriptovalyutalarla bağlıdır və bunların nəticələri həm ABŞ iqtisadiyyatı, həm də dünya üçün əhəmiyyətli olacaq.

Georgieva əlavə edib ki, ABŞ-dan sonra bir çox ölkələr də iqtisadi siyasətlərini dəyişdirərək yeni şəraitə uyğunlaşdırır. Lakin bu tendensiyanın ümumi nəticələrini müəyyən etmək hələlik çətindir.

Rəhbər, bölgələr üzrə risklərin fərqli olduğunu və qısa müddətdə ABŞ iqtisadiyyatında artımın üstünlük təşkil edəcəyini vurğulayıb. Bununla belə, bir çox digər ölkələrin inkişaf perspektivləri, tariflər və inflyasiya ilə mübarizə siyasətindəki pozuntular nəticəsində artan qeyri-müəyyənliklərdən təsirlənə bilər. Eyni zamanda, inkişaf etməkdə olan bazarlardan kapitalın çıxışı riski də artır.