Dünyanın ən iri konsaltinq və aktivlərin idarə edilməsi şirkətlərindən biri, 130 ölkədə 20 min əməkdaşı olan Mercer əcnəbi işçilər üçün ən bahalı və ən ucuz şəhərləri göstərən “Cost of Living” (Yaşam Xərci) adlı sorğu keçirib.

Fins.az xəbər verir ki, 209 şəhərin siyahısında doğma Bakımız da var.

Siyahıda 2020-ci illə müqayisədə maraqlı dəyişikliklər var. Ötən il 45-ci olan Livanın paytaxtı Beyrut bu il kifayət qədər yüksələrək, 3-cü ən bahalı şəhər adını qazanıb. Səbəb ölkədəki iqtisadi tənəzzül, pandemiya və siyasi risklərdir. Avstraliya və Avropa şəhərləri də yuxarıya doğru ən çox yerini dəyişib. Nyu-York 10 ən bahalı şəhər siyahısından çıxıb, ötən il 21-ci olan Moskva bu il 62-ci, 59-cu olan Sankt-Peterburq isə mövqeyini 60 pillə itirərək, 119-cu yerə düşüb.

Siyahıda birinci yeri isə ötən il 2-ci olan Türkmənistann paytaxtı Aşqabad tutub. Ərzaq çatışmazlığı və hiperinflyasiya bu mövqeyə təsir göstərib. Sıyahıda paytaxtımız Bakı 172-ci yerlə (mövqe dəyişməyib) İstanbulu qabaqlayıb (173, azalma 17 yer).

Ən ucuz şəhərlər Bişkek (209), Lusaka (208) və Tbilisidir (207).

İlk 10-luğun siyahısı (ən bahalı şəhərlər):

Aşqabat (Türkmənistan, +1);

Honkonq (Çin, -1);

Beyrut (Livan, +42);

Tokio (Yaponya, -1);

Sürix (İsveçrə, -1);

Şanxay (Çin, +1);

Sinqapur (Sinqapur, -2);

Cenevrə (İsveçrə, +1);

Pekin (Çin, +1);

Bern (İsveçrə, -2)

Tam siyahı ilə buradan tanış ola bilərsiniz.