Facebook Inc. şirkətinə daxil olan WhatsApp sosial platforması video görüşlərdə olan iştirakçı sayını maksimum artırıb.

Fins.az-ın məlumatına görə, bu günə qədər sadəcə 4 nəfərə dəstək verən platforma, indi iştirakçı sayını Andorid və iOS-un beta versiyalarında 8-ə yüksəldib.

Bildirilib ki, yeni funksiya aprelin sonundan etibarən bütün istifadəçilərə əlçatan olacaq. 8 nəfər eyni anda, istər görüntülü, istərsə də səsli qrup söhbətləri reallaşdıra biləcək. Görüntü keyfiyyətinin necə olacağı isə, əlbəttə ki, suallar arasındadır.

Xatırladaq ki, Houseparty 8, Google Duo kimi platformalar 12 nəfərə video görüşlərdə iştiraka imkan verir. Bundan başqa, WhatsApp-da ucdan-uca şifrələnmə funksiyasının olması video görüşlərin təhlükəsizliyinə təminat verir. Platformanın rəqiblərindən başqa bir üstünlüyü isə 2 milyardan çox istifadəçisinin olmasıdır.

Əlavə etmək yerinə düşər ki, koronavirusdan dolayı əksər insanların karantin rejimində qalması, video görüşləri reallaşdıran platformalara tələbatı artırıb.

©Facemark