Bu ilin üçüncü rübündə Gürcüstanda nominal ÜDM 13 446,5 milyon lariyə bərabər olub.

Fins..az Report-a istinadən xəbər verir ki, bu barədə Gürcüstanın Milli Statistika İdarəsinin hesabatında bildirilib.

ÜDM-in real artım tempi illik müqayisədə 5,8% olub, ÜDM deflyatoru isə 7,2% artıb.

İyul-sentyabr aylarında qonşu ölkədə real artım tikinti (17,1%), topdan və pərakəndə satış, avtomobil və motosikllərin təmiri (9,8%), incəsənət, əyləncə və rekreasiya (19,9%), istehsal (4,9%), informasiya və kommunikasiya (18,2%), daşınmaz əmlak (3,8%), səhiyyə və sosial fəaliyyət (8,1%), təhsil (6,3%) sahələrində qeydə alınıb.

Azalma isə mədənçıxarma və karxana (-2,2%), maliyyə və sığorta fəaliyyəti (-2,2%), dövlət idarəçiliyi və müdafiə; icbari sosial təminat (-4%) sahələrində müşahidə olunub.

Hesabat dövründə ÜDM-də ən böyük paya ticarət (14,3%), daşınmaz əmlak (10,9%), istehsal (10,8%), tikinti (10%) və digər sahələr sahib olub.