Finss.az - Bu gündən etibarən, Səhiyyə Nazirliyi və TƏBİB-in tabeliyində fəaliyyət göstərən tibb müəssisələrində sığortaolunanlar üçün xəstəlik vərəqələri yalnız elektron formada veriləcək.

Xəstəlik vərəqələri Səhiyyə Nazirliyinin “Vahid Səhiyyə İnformasiya Sistemi” vasitəsilə hazırlanacaq.

Yeni sistemə əsasən, tibb müəssisələri xəstəlik vərəqələrini e-imza ilə təsdiq edərək işəgötürənlərə və Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fonduna (DSMF) elektron qaydada göndərəcək. Bu elektron sənəd DSMF tərəfindən işçilərə müvəqqəti əmək qabiliyyətinin itirilməsinə, hamiləliyə və doğuma görə müavinətlərin təyinatı üçün əsas olacaq.

Səhiyyə Nazirliyi, Əmək və Əhalinin Sosial Müdafiəsi Nazirliyi ilə birgə, elektron xəstəlik vərəqələri barədə məlumatları vahid e-reyestrdə birləşdirib. Bu sistem sayəsində işəgötürənlər, e-bülletenləri Əmək və Əhalinin Sosial Müdafiəsi Nazirliyinin müvafiq informasiya sistemindən, tibb işçiləri isə “e-Səhiyyə” portalı və mobil tətbiqindən asanlıqla əldə edə biləcək.

Yeni yanaşma, qeyri-iş günlərində də elektron xəstəlik vərəqələrinin əldə edilməsinə imkan tanıyacaq, beləliklə, müvəqqəti əmək qabiliyyətinin itirilməsi ilə bağlı proses daha da sürətlənəcək.

Bu addım, tibb müəssisələri və dövlət orqanları arasında elektron informasiya mübadiləsini gücləndirərək, vətəndaşlara daha rahat xidmət təqdim edilməsini təmin edəcək.