“Aztelekom” MMC və “Bakı Telefon Rabitəsi” MMC müştəri təcrübələrinin yüksəldilməsi məqsədilə çağrı mərkəzləri vasitəsilə aparılan xidmətin keyfiyyətinin yaxşılaşdırılması istiqamətində fəaliyyətini davam etdirir. Bu məqsədlə müraciətlərin ATS, rabitə xidmətləri mərkəzləri və filiallardan çağrı mərkəzlərinə yönləndirilməsi qurum tərəfindən geniş şəkildə təşviq edilir.
Fins.az xəbər verir ki, görülən işlərin nəticəsidir ki, şirkətin “170” və “155” çağrı mərkəzləri tərəfindən 2023-cü ilin ilk yarımilində 703 min zəng emal olunub. Bu da ötən ilin müvafiq dövründə qeydə alınmış göstərici ilə müqayisədə 32% çoxdur.
Yaranmış tələbə uyğun olaraq, “Aztelekom” və “Baktelecom”da Müştəri əlaqələri departamentlərinin əməkdaş sayı artırılıb və görülən işlərin nəticəsi kimi Cəmiyyətlərdə 2023-cü ilin birinci yarımilində 2022-ci ilin müvafiq dövrü ilə müqayisədə çağrı mərkəzlərinin xidmət səviyyəsində və müraciətlərin həlli göstəricisində 3% artıma nail olunub.
Şirkət tərəfindən həyata keçirilən Regionlaşma Proqramı çərçivəsində 2022-ci ildə mərkəzləşdirilmiş “Sorğuların İcrasına Nəzarət Sistemi” proqram təminatı istifadəyə verilib. Sözügedən təminat bütün region və abunə şöbələrində müştəri müraciətlərinin vahid formatda qəbul və emalını həyata keçirməyə imkan yaradır. Mərhələli şəkildə tətbiq edilən proqram təminatının cari ilin mart ayından etibarən bütün region və şöbələrdə istifadəsi təmin olunub.
Bundan əlavə, şirkətin müştəri xidməti funksiyasını həyata keçirən heyətin peşəkarlığının yüksəldilməsi, standartlar və məhsullarla bağlı məlumatlılığın artırılması üçün daxili və xarici təlimlərə cəlb olunması prosesi davam edir.
Xatırladaq ki, 2022-ci il ərzində “Aztelekom”da regionlarda Müştəri Loyallığı İndeksində (Net Promoter Score – NPS) 2021-ci illə müqayisədə 23 bal, “Baktelecom”da isə həmin göstəricidə 18 bal artım qeydə alınıb.
Qeyd edək ki, “Aztelekom” dövlət-özəl tərəfdaşlıq modeli əsasında bir neçə telekommunikasiya operatorunun birgə səyləri nəticəsində həyata keçirilən “Onlayn Azərbaycan” layihəsinin əsas operatorudur. Layihə çərçivəsində GPON texnologiyası əsasında sürətli və kəsintisiz fiber-optik şəbəkənin qurulması həyata keçirilir. Bu günə qədər 1,17 milyondan artıq ev təsərrüfatı bu texnologiya əsasında sürətli və kəsintisiz fiber-optik internetlə əhatə olunub. Bu da hazırda ölkədə mövcud olan ev təsərrüfatlarının 44%-ni təşkil edir.
Layihənin əsas məqsədi dövlət-özəl tərəfdaşlıq modeli əsasında bir neçə telekommunikasiya operatorunun birgə səyləri nəticəsində 2024-cü ilin sonuna qədər minimum 25 Mbit/s internet sürəti ilə bütün ölkəni əhatə edən genişzolaqlı şəbəkə qurmaqdan ibarətdir. “Aztelekom” layihə çərçivəsində sürəti 100 Mbit/s-dək internet xidməti təqdim edir.
Məlumat üçün deyək ki, ölkədə genişzolaqlı internetin sürəti ilə bağlı beynəlxalq hesabatlarda əvvəlki aylarda olduğu kimi müsbət dinamika davam edir. “Ookla” şirkəti tərəfindən iyun ayında dərc edilən hesabatda ötən ilin müvafiq dövrü ilə müqayisədə internet sürətinin 22 Mbit/s-dən 29,47 Mbit/s-ə yüksəldiyi qeyd olunur.
