Hökumət, bazar və cəmiyyət yaşıl keçidi irəlilədə bilər.

Finss.az xəbər verir ki, bunu Bakı İqlim Fəaliyyəti Həftəsində (BCAW2025) çıxış edən Azərbaycanın energetika nazirinin müavini Elnur Soltanov deyib.

Onun sözlərinə görə,, insan iqlim məsələləri ilə uzun müddət məşğul olduqda, bu sahədə müəyyən təcrübə qazanır.

O, qeyd edib ki, sürətlə irəliləmək üçün bir neçə məqam önəmlidir. Birincisi, geosiyasət vacibdir, çünki proses interhökumətlidir və mürəkkəb mexanizmlər mövcuddur. Nazir müavini əlavə edib ki, cəmiyyətin, xüsusən gənclərin və uşaqların göstərdiyi təzyiq mühüm rol oynayır və bu, qlobal əhəmiyyət daşıyır.

E.Soltanov vurğulayıb ki, dövlətlərin milli maraqları ilə yaşıl keçidin üst-üstə düşməsi vacibdir və bu, texnoloji innovasiya və iqtisadiyyat baxımından önəm daşıyır. Bəzi ölkələr üçün isə məsələ enerji təhlükəsizliyi və özünəqabiliyyətlilikdir.

Nazir müavini qeyd edib ki, heç bir hökumət və ya hökumətlər birliyi prosesi təkbaşına lazımi sürətlə irəlilədə bilməz. 2050-ci il üçün “net-zero” və 1,5°C istiqamətli hədəflərə çatmaq üçün hökumətin əsas rolu özəl sektoru aktivləşdirməkdir.

O, əlavə edib ki, bazar qüvvələrinin iştirakı vacibdir, çünki bəzi yaşıl texnologiyalar bazar tərəfindən həyata keçirilə bilər, lakin bəziləri hələ çox bahalıdır. Hökumət və fondlar prosesi sürətləndirməli, lazım gələrsə əlavə resurs xərcləməlidir ki, bazar qüvvələri işə düşsün və irəliləsin.

E.Soltanov həmçinin qeyd edib ki, cəmiyyətin rolu da önəmlidir. İnsanların həvəsi, yaradıcılığı və uşaqların valideynlərinə göstərdiyi təzyiq yaşıl keçidin irəliləməsinə güclü təsir göstərir.