Finss.az xəbər verir ki, çərşənbə günü Brent və WTI markalı neftin fyuçers qiymətləri artıb. Qiymət artımı əsasən ABŞ-ın Rusiya neftinin alıcılarına təzyiqlərinin artacağına dair gözləntilər və Yaxın Şərqdə gərginliyin davam etməsi fonunda baş verir.

Londonun ICE Futures birjasında Brent markalı neftin noyabr fyuçersləri hazırda bir barel üçün 67,05 dollar təşkil edir ki, bu da əvvəlki hərracla müqayisədə 0,66 dollar və ya 0,99% artım deməkdir. Çərşənbə axşamı bu qiymət 0,37 dollar (0,56%) bahalaşmışdı.

Nyu-York əmtəə birjasında (NYMEX) isə WTI markalı neftin oktyabr fyuçersləri hazırda 63,28 dollar/barel səviyyəsindədir. Bu da 0,65 dollar (1,04%) artım deməkdir. Əvvəlki sessiyada isə qiymət 0,37 dollar (0,59%) artaraq 62,63 dollar/barel olmuşdu.

Ekspertlər qeyd edir ki, geosiyasi risklər və təchizat zəncirində gözlənilən dəyişikliklər, xüsusən də Rusiyaya qarşı mümkün sanksiyalar, neft bazarında artan qeyri-müəyyənliyə səbəb olur və qiymətlərin yüksəlməsinə təkan verir.