Finss.az xəbər verir ki, çərşənbə axşamı neft qiymətləri sabit qalıb. Treyderlər, neft bazarında tələb və təklif balansına dair yeni siqnallar gözlədikləri üçün ehtiyatlı mövqe tuturlar.

ABŞ və Çin arasında ticarət “atəşkəsi”nin daha 90 gün – 2025-ci il noyabrın 10-na qədər uzadılması investorların neftə tələbatın azalacağı ilə bağlı narahatlıqlarını azaldıb. ABŞ Prezidenti Donald Tramp bu barədə fərman imzalayıb. Əvvəlki 90 günlük möhlət avqustun 12-də başa çatırdı.

Moskva vaxtı ilə saat 14:00-a olan məlumata görə:

• Brent markalı neftin oktyabr fyuçersləri Londonun ICE Futures birjasında 0,02 dollar (0,03%) bahalaşaraq 66,65 dollar/barel olub.

• WTI markalı neftin sentyabr fyuçersləri Nyu-Yorkun NYMEX birjasında 0,01 dollar (0,02%) ucuzlaşaraq 63,95 dollar/barel təşkil edib.

Bazar diqqətini ABŞ və Rusiya prezidentlərinin Alyaskada keçirilməsi planlaşdırılan görüşünə yönəldib. Görüşün Ukrayna münaqişəsinin həlli istiqamətində təşəbbüslər ortaya qoya biləcəyi gözlənilir. Lakin ABŞ prezidentinin açıqlamaları gözləntiləri bir qədər yumşaldıb. Tramp görüşün “Rusiya prezidentini bir az araşdırmaq” məqsədi daşıdığını bildirib.

Bundan əlavə, investorlar iyul ayı üzrə ABŞ-da istehlak qiymətləri indeksinə dair açıqlanacaq statistikaya diqqət yetirirlər. Bu məlumatlar Vaşinqtonun ticarət siyasətinin ölkə inflyasiyasına təsirini göstərəcək.