Finss.az xəbər verir ki, neft qiymətləri Cümə günü və ötən həftə ərzində enişdən sonra bazar ertəsi səhər bahalaşır.

Moskva vaxtı ilə saat 8:10-a kimi Londonun ICE Futures birjasında Brent markalı neftin sentyabr fyuçersləri 0,52 dollar (0,76%) bahalaşaraq 68,96 dollar/barelə çatıb. Ötən cümə günü bu müqavilələr bir barel üçün 0,74 dollar (1,1%) azalaraq 68,44 dollar olub.

Bu vaxta qədər WTI markalı neftin sentyabr fyuçersləri NYMEX birjasında 0,46 dollar (0,71%) bahalaşaraq bir barelə görə 65,62 dollar olub. Əvvəlki sessiyada müqavilə bir barel üçün 0,87 dollar (1,3%) azalaraq 65,16 dollar olub.

Ötən həftə Brent təxminən 1%, WTI 3% ucuzlaşıb.

Bazar ertəsi sitatlar ABŞ prezidenti Donald Tramp və Avropa Komissiyasının sədri Ursula fon der Leyen arasında Şotlandiyada keçirilən görüşdə Avropa İttifaqı ilə ABŞ arasında ticarət sazişi imzaladığı xəbəri ilə dəstəklənib.

KİV xəbər verir ki, saziş çərçivəsində ABŞ avtomobillər də daxil olmaqla, əksər Avropa mallarının idxalına 15% rüsum tətbiq edəcək. Eyni zamanda, polad və alüminium üçün rüsumlar dəyişməz olaraq qalır.

Trampın sözlərinə görə, Aİ 750 milyard dollara enerji resursları almağa, ABŞ-a 600 milyard dollar sərmayə qoymağa, ölkələrin bazarlarını sıfır tariflərlə ABŞ-la ticarətə açmağa və çoxlu sayda hərbi texnika almağa razılaşıb.

Baker Hughes-un məlumatına görə, son bir həftə ərzində ABŞ-da aktiv neft qazma qurğularının sayı 7 ədəd azalaraq 415 ədəd təşkil edib ki, bu da 2021-ci ilin sentyabrından bəri ən aşağı göstəricidir. Qaz buruqlarının sayı 5 ədəd artaraq 122 ədədə çatıb.