Finss.az xəbər verir ki, cümə axşamı səhər ABŞ-da yanacaq ehtiyatları ilə bağlı məlumatlar və ABŞ ilə Avropa İttifaqı arasında ticarət razılaşmasına ümidlər əsasında neft qiymətləri mülayim şəkildə yüksəlir.

Londonun ICE Futures birjasında Brent markalı neftin sentyabr fyuçerslərinin dəyəri, Moskva vaxtı ilə saat 8:13-ə olan məlumata görə, 0,24 dollar (0,35%) bahalaşaraq bir barel üçün 68,75 dollar təşkil edib. Çərşənbə günü bu kontraktlar 8 sent azalaraq 68,51 dollar/barelə düşüb.

Nyu-York əmtəə birjasında (NYMEX) elektron hərraclarda sentyabr ayı üçün WTI markalı neftin fyuçersləri bu vaxta qədər 0,32 dollar (0,49%) bahalaşaraq 65,57 dollar/barelə çatıb. Əvvəlki sessiyanın nəticələrinə görə, bu müqavilələrin dəyəri 6 sent azalaraq bir barel üçün 65,25 dollar təşkil edib.

Bir gün əvvəl ABŞ Energetika Nazirliyi ölkədəki kommersiya neft ehtiyatlarının ötən həftə 3,17 milyon barel azaldığını bildirmişdi. “Trading Economics”in məlumatına görə, ekspertlər orta hesabla 1,6 milyon barel azalma gözləyirdilər.

Benzin ehtiyatları 1,74 milyon barel azalıb, distillatlar 2,93 milyon barel artıb.

Bu arada, Nyu-York Ticarət Birjasında (NYMEX) ticarət edilən neftin saxlandığı Cushing terminalında ehtiyatlar keçən həftə 455 min barel artıb.