Finss.az - Bu gündən İqtisadi İslahatların Təhlili və Kommunikasiya Mərkəzi (İİTKM), Azərbaycan Respublikasının Kiçik və Orta Biznesin İnkişafı Agentliyi (KOBİA), Kiçik və Orta Biznes Subyektləri və Klublarının Assosiasiyası (KOBSKA) və Türkiyənin “Rok Expo” şirkətinin birgə təşkilatçılığı ilə Bakıda “II Türk dövlətləri ticarət və investisiya əməkdaşlıq forumu və sərgisi” keçirilir.

Forumda açılış nitqi ilə İqtisadi İslahatların Təhlili və Kommunikasiya Mərkəzinin icraçı direktoru professor Vüsal Qasımlı , Azərbaycan Respublikası Kiçik və Orta Biznesin İnkişafı Agentliyinin (KOBİA) İdarə Heyətinin birinci müavini Samir Hümbətov, Milli Məclisin deputatı Məzahir Əfəndiyev,   Azərbaycan Banklar Assosiasiyasının prezidenti Zakir Nuriyev, Azərbaycan Sahibkarlar Konfederasiyasının vitse-prezidenti Vüqar Zeynalov , Özbəkistanın Azərbaycandakı səfiri Bahrom Aşrafxanov, Kiçik və Orta Biznes Subyektləri və Klublarının Assosiasiyasının (KOBSKA) təmsilçisi Ramin Şərifov çıxışlar ediblər.Onlar Azərbaycanda Türk dövlətlərinin təmsilçilərinin iştirakı ilə belə bir forum və sərginin keçirilməsinin əhəmiyyətini vurğulayıb, investisiya mühitinin formalaşması üçün vacib amil hesab ediblər.

Forumun açılışında Azərbaycana qonaq gələn digər qurumların rəsmiləri də çıxış ediblər. Özbəkistanın Ticarət və Sənaye Palatasının sədr müavini vəzifəsini icra edən Şotursunova Nodirə Nosirovna, Türkiyənin  Azərbaycandakı Səfirliyinin Ticarət Baş Müşaviri Murat Yaman, Şimali Kipr Türk Respublikasının iqtisadiyyat və enerji naziri Olgun Amcaoğlu  və Türk Ticarət Sərgisi Təşkilatçısı, “ROK Expo” şirkətinin sədri Aygün Əliyeva tədbirlə bağlı fikirlərini bölüşüblər.  

İyun ayının 12-ə qədər üç gün ərzində keçiriləcək Forumda “Türk dövlətləri iqtisadiyyatı”, “Türk dövlətlərində kənd təsərrüfatı ticarəti və imkanları”, “Kommersiya mübahisələrinin həllində arbitraj və mediasiya”, “Türk dövlətlərində rəqəmsal ticarət”, “Türk dünyası biznes qadınları zirvəsi”, “Akademik istiqamətlər”, “Startaplar və investisiyalar”, “Türk dünyasında mediyanın gücü” mövzularında panel müzakirələri təşkil olunacaq.

Forumla birgə təşkil olunan sərgi çərçivəsində 10 ölkədən 35-ə yaxın sahə üzrə, o cümlədən ticarət, enerji, yaşıl iqtisadiyyat, turizm, rəqəmsallaşma və hətta kosmik tədqiqatlara qədər məhsullar və qabaqcıl texnologiyalar nümayiş etdirilir. Tədbir çərçivəsində ikitərəfli görüşlər keçirilir, şirkətlərin strateji tərəfdaşlıqları qurulur və türk dövlətlərinin ortaq brendlərinin yaradılması ilə bağlı müzakirələr aparılır.

Beynəlxalq tədbir Türk dövlətləri arasında iqtisadi əməkdaşlığın dərinləşdirilməsi, ticarət həcminin artırılması və birgə investisiya layihələrinin reallaşdırılması baxımından mühüm platforma rolunu oynayır.

Zemfira Ms
Finss.az