Finss.az - 2025-ci ilin yanvar-aprel aylarında Azərbaycanda maşın və avadanlıqların, avtomobil, qoşqu və yarımqoşquların istehsalı sahələrində ümumilikdə 205,8 milyon manatlıq məhsul istehsal edilib.

Dövlət Statistika Komitəsinin məlumatına əsasən, ötən ilin eyni dövrü ilə müqayisədə maşın və avadanlıqların istehsalı 26,6 faiz artıb, avtomobil, qoşqu və yarımqoşquların istehsalı isə 3,9 faiz azalıb.

Hesabat dövründə 1824 ədəd minik avtomobili istehsal olunub ki, bu da əvvəlki ilin eyni dövrü ilə müqayisədə 876 ədəd və ya 92,4 faiz çoxdur. Eyni zamanda, traktor istehsalı 14,6 faiz azalaraq 199 ədəd təşkil edib.

Maşın və avadanlıqlar sahəsində istehsalın əsas göstəricilərinə gəlincə:

• 1863 ədəd nasos istehsal olunub (o cümlədən 1460 ədəd ştanqlı quyu nasosu),

• 1,7 ton kran, qapaq və klapanlar hazırlanıb,

• 199 ədəd traktor istehsal edilib.

Avtomobil sektorunda isə:

• 1824 ədəd minik avtomobili,

• 33 ədəd yük avtomobili istehsal olunub.

2025-ci ilin əvvəli ilə müqayisədə istehsal dinamikasında da nəzərəçarpacaq dəyişikliklər müşahidə olunur. Belə ki, 2025-ci ilin yanvarında maşın və avadanlıqların istehsalı ötən ilin yanvarına nisbətən 47,4 faiz təşkil edirdisə, yanvar-aprel aylarında bu göstərici 126,6 faizə yüksəlib. Avtomobil, qoşqu və yarımqoşquların istehsalında isə eyni dövrdə azalma müşahidə olunub – yanvar ayında 79,3 faiz, yanvar-apreldə isə 96,1 faiz səviyyəsində qeydə alınıb.

Hazır məhsul ehtiyatlarına görə, may ayının əvvəlinə olan vəziyyətə əsasən:

• 701 ədəd nasos,

• 10 ədəd traktor,

• 138 ədəd minik avtomobili,

• 13 ədəd yük avtomobili ehtiyatda qalıb.