Cümə axşamı səhər neft qiymətləri əvvəlki günə olan itkiləri geri qaytararaq yüksəlir.

Finss.az xəbər verir ki, Moskva vaxtı ilə saat 8:03-ə Londonun ICE Futures birjasında Brent markalı neftin iyul fyuçerslərinin qiyməti bir barel üçün 61,5 dollar təşkil edir ki, bu da əvvəlki hərracların bağlanışına nisbətən 0,38 dollar (0,62%) bahadır. Çərşənbə günü bu kontraktların qiyməti 1,03 dollar (1,66%) ucuzlaşaraq 61,12 dollar/barel olub.

Nyu-York əmtəə birjasının (NYMEX) elektron ticarətində iyun ayı üçün WTI markalı neftin fyuçersləri bu vaxta qədər 0,44 dollar (0,76%) bahalaşaraq bir barelə görə 58,51 dollar təşkil edib. Əvvəlki sessiyanın yekunlarına görə onların qiyməti 1,02 dollar (1,73%) azalaraq 58,07 dollar/barelə bərabər olub.

Sitatlar ABŞ və Çin arasında qarşıdan gələn ticarət danışıqları ilə bağlı ümidlərlə dəstəklənir. Bundan əvvəl ABŞ-ın maliyyə naziri Skott Bessent bu həftə İsveçrədə Çin nümayəndələri ilə görüşəcəyini bildirmişdi. Pekin də bu cür danışıqlara hazır olduğunu təsdiqləyib.