Qızılın qiyməti bir unsiya üçün 3500 dolları keçərək növbəti rekorda imza atıb.

Finss.az xəbər verir ki, ənənəvi olaraq, qiymətli metala və digər təhlükəsiz sığınacaq aktivlərinə, o cümlədən dollara və ABŞ xəzinədarlığına tələb artan iqtisadi qeyri-müəyyənlik fonunda artır. Ekspertlərin fikrincə, bu dəfə ticarət müharibəsinin ABŞ iqtisadiyyatı üçün nəticələrindən qorxan investorlar Amerika aktivlərinə deyil, qızıla və ya yen və ya İsveçrə frankı kimi daha təhlükəsiz valyutalara sığınırlar.

Bu ilin əvvəlindən qızıl demək olar ki, 30% bahalaşıb.

Kallanish Index Services analitiki Li Lianq Le deyib: "Bu il qızıl qiymətlərinin sürətlə artması mənə bazarların ABŞ-a hər zamankindən daha az inamla yanaşdığını göstərir".

Comex birjasında iyun ayı qızıl fyuçerslərinin qiyməti Moskva vaxtı ilə saat 13:00-a 1 unsiya üçün 3467,4 dollar təşkil edib. Əvvəlki ticarət sessiyasında o, bir unsiya üçün 3 509,9 dollara qədər bahalaşıb.