Azərbaycan Respublikasının Dövlət Neft Fondu (ARDNF) qızıl yatırımlarını əhəmiyyətli dərəcədə artıraraq investisiya portfelində bu sahənin payını genişləndirib.

Finss.az xəbər verir ki,  bu barədə ARDNF məlumat yayıb.

Məlumata görə, 2025-ci ilin ilk rübündə Fondun ümumi investisiya portfelinin 16 milyard 134,4 milyon ABŞ dolları həcmində olan hissəsi, yəni 25,8%-i qızıl yatırımlarından ibarət olub. Müqayisə üçün qeyd edək ki, ötən ilin sonunda bu rəqəm 12 milyard 354,6 milyon dollar və ya 20,6% təşkil edirdi. Beləliklə, qızıl yatırımlarında cəmi üç ay ərzində 3 milyard 779,8 milyon dollarlıq artım qeydə alınıb.

Bununla yanaşı, ARDNF 2025-ci ilin ilk rübündə 18,7 ton qızıl alıb. Əgər 2024-cü ilin sonunda Fondun qızıl ehtiyatı 146,6 ton idisə, bu ilin 1 aprel tarixinə həmin göstərici 165,3 tona çatıb. Ümumilikdə isə ARDNF 2024-cü ilin əvvəlindən bəri 63,5 ton qızıl alışı həyata keçirib.

Fuad Mədətov
Finss.az