Neft qiymətləri cümə axşamı səhər ABŞ-ın bir sıra ölkələrdən idxala tarifləri dayandıracağı xəbəri ilə bu ilin ən yaxşı qazancını əldə etdikdən sonra ucuzlaşır.

Finss.az xəbər verir ki, Londonun ICE Futures birjasında Brent markalı neftin iyun fyuçerslərinin qiyməti Moskva vaxtı ilə saat 8:16-a olan vəziyyətə görə 0,7 dollar (1,07%) ucuzlaşaraq bir barel üçün 64,78 dollar olub. Çərşənbə günü bu kontraktların qiyməti 2,66 dollar (4,23%) artaraq 65,48 dollar/barel olub.

Nyu-York əmtəə birjasında (NYMEX) may ayı üçün WTI neftinin fyuçersləri bu vaxta qədər 0,58 dollar (0,93%) ucuzlaşaraq bir barelə görə 61,77 dollar təşkil edib. Əvvəlki sessiyanın yekunlarına görə, bu müqavilələrin dəyəri 2,77 dollar (4,65%) artaraq bir barel üçün 62,35 dollar təşkil edib.