Fins.az - İqtisadi İslahatların Təhlili və Kommunikasiya Mərkəzində (İİTKM) Milli Məclisin deputatı Elman Nəsirov könüllülərlə görüş keçirib.  "İlham Əliyev: tarixi şəxsiyyət və qlobal lider" mövzusunda çıxış edən millət vəkili Azərbaycanın əldə etdiyi uğurlar və beynəlxalq arenada qazandığı nailiyyətlər barədə danışıb. O bildirib ki, Prezident İlham Əliyevin apardığı daxili və xarici siyasət istər regional, istər qlobal səviyyədə dövlətimizin nüfuzunu və strateji mövqeyini gücləndirib.

Elman Nəsirov ölkənin gələcəyində gənclərin oynadığı rolu, insan kapitalının inkişaf etdirilməsinin əhəmiyyətini vurğulayıb. O, gənclərin bilik və bacarıqlarının inkişaf etdirilməsinin, Azərbaycanı beynəlxalq səviyyədə layiqincə təmsil etmələrinin vacibliyini qeyd edib.

Görüşdə İqtisadi İslahatların Təhlili və Kommunikasiya Mərkəzinin İslahat könüllüləri ilə yanaşı, Miqrasiya könüllüləri, İnnovasiya könüllüləri, Bir Könüllü, Turizm könüllüləri və Mədəniyyət könüllüləri təşkilatlarının üzvləri də iştirak ediblər. Milli Məclisin deputatı gənclərin suallarını cavablandırıb, onları maraqlandıran məsələləri ətraflı şərh edib.

Sonda qonağa İİTKM-in nəşri olan “Türk dövlətləri iqtisadiyyatı” kitabı təqdim olunub.