Fins.az - Qazaxıstanın Cambıl vilayətində yeni bir metallurgiya zavodunun tikintisinə başlanılır.

Layihəyə investisiya həcmi 107 milyon ABŞ dolları təşkil edəcək. Zavodun tikintisini «KazProTemir» şirkəti həyata keçirəcək və «Taraz» sənaye parkında yerləşəcək.

Zavod, qara metal emalı, kvadrat şəkilli həcmli məhsulların istehsalı və nazik təbəqəli polad istehsalını həyata keçirəcək. Eyni zamanda, polad məhsulların üzərinə sink və polimer örtükləri tətbiq ediləcək.

Layihənin illik gücü 500 min ton polad məhsulu istehsal etməkdir. Ümumi dəyəri 55,4 milyard tenge (107 milyon ABŞ dolları) olan bu layihənin birinci mərhələsinin 2025-ci ilin may ayında işə salınması planlaşdırılır.

Hazırda zavodun tikiləcəyi sahədə yol tikintisi işləri aparılır, quyular qazılıb və kotlovan açılıb. Torpaq işləri tamamlanıb və tikintinin ilk mərhələsi üçün hazırlıq işləri yekunlaşıb. Zavodda istifadə ediləcək bütün xammal yerli istehsaldan təmin ediləcək.

Bu layihə, Qazaxıstanın sənaye sektorunun inkişafına və yerli istehsalatın gücləndirilməsinə mühüm töhfə verəcək.