Son illərdə Azərbaycanda təhsil xidmətlərinə olan tələbatın artması fonunda, xüsusi hazırlıq kurslarının qiymət və keyfiyyət göstəriciləri böyük diqqət mərkəzindədir. Hədəf Kurslarının son 5 ildə qiymət artımı, xidmət keyfiyyəti və müştəri məmnuniyyəti ilə bağlı cavablandırdığı suallara əsaslanaraq, təhlil aparırıq.

Bu barədə Fins.az-ın sorğusuna cavab olaraq Hədəf Kurslarından bildirilib.

Qiymət Artımları və Güzəştlər

Hədəf Kursları son 5 il ərzində təhsil haqqına təxminən 25% artım tətbiq etmişdir. 5 il əvvəl XI sinif şagirdlərinin orta aylıq təhsil haqqı 240 AZN təşkil edirdi, bu gün isə bu məbləğ 300 AZN-ə qədər yüksəlib. Lakin bu artımın illik göstəricisi 5%-dən çox deyil, bu da artımın sabit templə baş verdiyini göstərir.

Əlavə olaraq, Hədəf Kursları təhsil müddətini davam etdirən abituriyentlərə 15%-lik güzəştlər təqdim edir. Kurslarda təhsil alan Qarabağ müharibəsi iştirakçılarının övladlarına, şəhid ailələrinə və istedadlı abituriyentlərə xüsusi güzəştlər nəzərdə tutulur. Bu siyasətlər, kursun müştəri məmnuniyyətini yüksək səviyyədə saxlamağa xidmət edir. Hazırda müştərilərin 80-90%-i göstərilən xidmətlərdən məmnun qaldığını bildirir.

Əlavə Xidmətlər

Hədəf Kurslarında göstərilən tədris xidmətlərinə əlavə olaraq, illik 60 AZN məbləğində birdəfəlik xidmət haqqı tətbiq olunur. Bu məbləğ tədris resursları, psixoloji və motivasiya seminarları, ixtisas seçimi və ali məktəblərə sənədlərin təsdiqi kimi xidmətləri əhatə edir. Bundan əlavə, kurslarda aylıq sınaq imtahanları, fərdi konsultasiyalar və əlavə dərslər ödənişsiz təşkil olunur, bu da kursun tədris keyfiyyətini artıran mühüm amillərdən biridir.

Keyfiyyət Standartları və Təkmilləşmə Prosesləri

Hədəf Kursları 15 ildən artıq təhsil sahəsində fəaliyyət göstərən milli brend olaraq, minlərlə abituriyentin ali təhsil müəssisələrinə qəbul olmasına töhfə vermişdir. Hər tədris ilində aparılan anonim anketlər və sorğular əsasında tədris keyfiyyətinin təkmilləşdirilməsi istiqamətində addımlar atılır.

Müəllim heyətinin işə qəbulu ciddi imtahanlar vasitəsilə həyata keçirilir. Bu proses iki mərhələdən ibarət olub, həm test imtahanı, həm də müsahibəni əhatə edir. İmtahanlardan uğurla keçən müəllimlər üçün hər il təkmilləşdirmə kursları və attestasiya imtahanları təşkil olunur. Peşəkar kadrların hazırlanması və təkmilləşdirilməsi Hədəf Kurslarının əsas məqsədlərindən biridir.

Hədəf Kurslarının qiymət artımları və güzəştlər siyasəti abituriyentlər və onların valideynləri üçün tədris keyfiyyətinin və əlçatanlığının qorunub saxlanmasına yönəlib. Kursun təqdim etdiyi əlavə xidmətlər və müəllim heyətinin təkmilləşdirilməsi prosesi bu təhsil müəssisəsinin yüksək keyfiyyət standartlarını göstərir. Təhsil sahəsində Hədəf Kursları öz brend imicini möhkəmləndirərək, abituriyentlərin ali təhsil alma yolunda güclü bir dəstək olaraq qalır.

Fuad Mədətov
Fins.az