Rəqəmsal İnkişaf və Nəqliyyat Nazirliyinin tabeliyində olan “AzInTelecom” MMC-nin hazırladığı “SİMA İmza” mobil tətbiqinin istifadəçi sayı 500 mini ötüb.
RİNN-dən Fins.az-a bildirilib ki, Azərbaycanda rəqəmsal transformasiyanı sürətləndirən “SİMA İmza” artıq ekosistemdə həm istifadəçilər, həm də xidmət təqdim edənlər üçün yeni qaydalar, yeni tələblər formalaşdırır. Biometrik həllərə, bulud texnologiyasına və süni intellektə əsaslanan, hüquqi olaraq əl imzasına bərabər olan “SİMA İmza” ilə hazırda 30-a yaxın qurum öz xidmətlərini rəqəmsallaşdırıb. SİMA rəqəmsal imza ilə 80-dən artıq dövlət elektron portalına giriş təmin edilib. Müxtəlif sahələr üzrə fəaliyyət göstərən 100-dən çox qurumla SİMA yeni nəsil rəqəmsal imzanın inteqrasiyası davam etdirilir.
Həmçinin “SİMA İmza” ilə artıq elektron imza əldə etmək üçün xidmət mərkəzlərindən asılılığa son qoyulub. Bununla da dünyanın istənilən nöqtəsində yaşayan və internetə çıxış imkanı olan hər bir Azərbaycan vətəndaşı və fərdi sahibkarlıq fəaliyyəti göstərən vətəndaşlarımız olduğu yerdən elektron xidmətlərdən yararlana bilir. Bu imkan vətəndaş məmnuniyyətinin artırılmasına, fərdlərin rəqəmsal hökumət konseptindəki rolunun daha da aktivləşməsinə və fərdi sahibkarlıq subyektlərinin fəaliyyətinin daha da sadələşməsinə təkan verir. Rəqəmsal xidmətlərə əlçatanlığı artıran rəqəmsal imzanın ölkəmizdə biznes proseslərini sürətləndirdiyi müşahidə olunur.
“SİMA İmza” həm vətəndaşlar, həm də xidmət təklif edənlər üçün bir sıra üstünlüklər təqdim edir:
Vətəndaşlar üçün pulsuzdur – “SİMA İmza” mobil tətbiqini yükləyib qeydiyyatdan keçən hər bir vətəndaş rəqəmsal imza sertifikatını ödənişsiz olaraq əldə edir.
Əl imzası ilə bərabərhüquqludur – “Elektron imza və elektron sənəd haqqında” Qanunun 3-cü maddəsinə əsasən, gücləndirilmiş elektron imza əl imzası ilə bərabər hüquqi qüvvəyə malikdir. SİMA yeni nəsil rəqəmsal imza gücləndirilmiş imzadır.
Təhlükəsizdir – “SİMA İmza” biometriya, bulud, açıq açar və süni intellekt texnologiyası əsasında çalışır. Bu da imzalama prosesi zamanı kənar amillərin müdaxiləsinin qarşısını alır. Tətbiq həssas məlumatları qorumaq üçün ən müasir şifrləmə protokollarından və autentifikasiya mexanizmlərindən istifadə edir. “SİMA İmza” ilə imzalanmış sənədlər təkzibolunmazdır.
Əlçatandır – İnternetə çıxış olan istənilən yerdə, istənilən vaxt “SİMA İmza” tətbiqini mobil cihaza yükləmək və qeydiyyatdan keçmək mümkündür. Qeydiyyat üçün sadəcə şəxsiyyət vəsiqəsi kifayət edir və proses təxminən 1 dəqiqə ərzində yekunlaşır.
Xərclərə qənaət – İstənilən sistemə inteqrasiya oluna bilən “SİMA İmza” dövlət qurumları və maliyyə təşkilatları üçün istənilən sayda imzalama imkanı qazandırır. Maliyyə xərcləri azalır, vaxt itkisi aradan qalxır. Fiziki müraciətlərin qəbulu üçün əlavə işçi və kağız sənədlər saxlamağa, onları arxivləşdirməyə ehtiyac qalmır. Uzun və yorucu növbə proseslərini aradan qaldırır.
İstifadəçilər “Play Store” və ya “App Store” platformaları üzərindən “SİMA İmza” mobil tətbiqini yükləyib qeydiyyatdan keçməklə rəqəmsal imza sahibi ola bilərlər.
SİMA yeni nəsil rəqəmsal imza ilə bağlı daha ətraflı məlumatı www.sima.az saytından və “157” Zəng Mərkəzi ilə əlaqə saxlayaraq əldə edə bilərsiniz.
Günel Məlikzadə
Fins.az
