Dünən Birləşmiş Ərəb Əmirliklərinin Dubay şəhərində Ümumdünya Radiorabitə Konfransı öz işinə başlayıb.

Qurumdan Fins.az-a verilən məlumata görə, tədbirdə ölkəmizi Rəqəmsal İnkişaf və Nəqliyyat Nazirliyinin nümayəndələri ilə yanaşı, Dövlət Radiotezliklər İdarəsi, Azərkosmos və İnformasiya Kommunikasiya Texnologiyaları Agentliyinin mütəxəssisləri təmsil edirlər.

Konfransda gündəliyə daxil olan məsələlər, o cümlədən növbəti illərdə yeni nəsil yerüstü və peyk texnologiyalarının, habelə aeronaviqasiya xidmətlərinin tətbiqi üçün radiotezliklərdən səmərəli və maneəsiz istifadənin təmin edilməsi üzrə hazırlanmış müvafiq tövsiyə və qətnamə xarakterli sənədlərə baxılaraq təsdiq ediləcək.

Həmçinin tədbir çərçivəsində Azərbaycanın milli maraqlarının qorunması və müvafiq razılaşmaların əldə edilməsi üçün aidiyyəti ölkələrin rabitə administrasiyaları ilə zəruri koordinasiya görüşlərinin keçirilməsi nəzərdə tutulur.

Konfrans öz işini dekabrın 15-dək davam etdirəcək.

Günel Məlikzadə
Fins.az