Rəqəmsal İnkişaf və Nəqliyyat Nazirliyinin tabeliyində olan “AzInTelecom” MMC tərəfindən yaradılmış SİMA – bulud əsaslı yeni nəsil rəqəmsal imza maliyyə qurumları üzrə tərəfdaş çevrəsini genişləndirməyə davam edir.

RİNN-dən Fins.az-a bildirilib ki, SİMA rəqəmsal imzanın yeni tərəfdaşı kredit proseslərini tam avtomatlaşdıran onlayn “OnePoint” startapı olub.

“SİMA İmza”nın “OnePoint”ə inteqrasiyası nəticəsində kredit üçün müraciət edən şəxslər qısa müddətdə pulu birbaşa plastik karta köçürə biləcəklər. Kredit müraciəti edən vətəndaşların şəxsiyyət vəsiqəsi, iş yeri, kredit tarixçəsi və s. kimi məlumatlarının təsdiqlənməsi SİMA rəqəmsal imza ilə mümkün olduğundan hər hansı kağız sənəd təqdim etməyə ehtiyac qalmayacaq. Belə ki, skorinq vasitəsilə anında yoxlanış aparılacaq və müsbət cavab almış müştərilər sənədləri “SİMA İmza” ilə imzalayıb krediti dərhal plastik karta köçürəcəklər.

Qeyd edək ki, SİMA yeni nəsil rəqəmsal imza ilə həm vətəndaşlar, həm də təşkilatlar xərclərinə və vaxtına qənaət edir. SİMA-nın istənilən sistemə inteqrasiya oluna bilməsi, eləcə də avtomatlaşdırma istifadəçilər üçün sürətli və istənilən sayda imzalama imkanı qazandırır. Rəqəmsal xidmətlərə əlçatanlığı artıran rəqəmsal imzanın ölkəmizdə biznes proseslərini sürətləndirəcəyi gözlənilir.

Vətəndaşlar üçün ödənişsiz olan imzanı SİMA tətbiqini mobil cihaza yükləyib qeydiyyatdan keçərək əldə etmək olar.

SİMA rəqəmsal imza ilə bağlı daha ətraflı məlumatı www.sima.az saytından və “157” Zəng Mərkəzi ilə əlaqə saxlayaraq əldə edə bilərsiniz.

Günel Məlikzadə
Fins.az