Oktyabrın 26-27-də Bakıda Ekologiya və Təbii Sərvətlər Nazirliyi Dövlət Mineral Xammal Ehtiyatlarından İstifadə Agentliyi və Geoloji Kəşfiyyat Agentliyi tərəfindən Ulu Öndər Heydər Əliyevin 100 illik yubileyinə həsr olunmuş Beynəlxalq Geologiya-Mədənçilik Forumu keçirilib.
Norm ASC-dən Fins.az-a verilən məkumata görə, belə irimiqyaslı və əhəmiyyətli tədbirin keçirilməsində agentliklər mühüm rolu öz öhdəsinə götürüb, 30 ölkədən 70 ekspertdən ibarət müxtəlif qrupları bir araya gətirməklə, Azərbaycanın mədənçilik sənayesinin dayanıqlı inkişafı və bu sahədə texnoloji irəliləyişlər üçün zəmin yaradıb. Forum mədənçilik sənayesində qlobal əməkdaşlığın inkişafını dəstəkləməklə, eləcə də təbii ehtiyatların idarə olunmasında Azərbaycanın potensialını vurğulamaqla, dayanıqlı mədənçilik təcrübələrinin və innovasiyaların təşviqində mühüm rol oynayan strateji platformaya çevrilib.
Dünyanın müxtəlif ölkələrindən dağ-mədən sənayesi mütəxəssislərinin bir araya gəldiyi tədbirə “Norm” ASC sponsor qismində dəstək göstərib. Forumun gündəliyinə dağ-mədən sahəsi üzrə yeni texnologiyalar və onların tətbiqində beynəlxalq təcrübədən istifadə, eləcə də bu sənayenin ətraf mühitə təsirinə dair mövzular daxil edilib. Forum çərçivəsində təşkil olunan panel müzakirələrində yerli və xarici mütəxəssislər çıxış ediblər.
Beynəlxalq əməkdaşlığın gücləndirilməsi və təcrübə mübadiləsinin aparılması məqsədilə forumda Türkiyə Respublikası Energetika və Təbii Sərvətlər Nazirliyinin Mədən və Neft İşləri Baş İdarəsi ilə Azərbaycan Respublikası Ekologiya və Təbii Sərvətlər Nazirliyinin Dövlət Mineral Xammal Ehtiyatlarından İstifadə Agentliyi arasında niyyət protokolu imzalanıb.
Mədənçilik fəaliyyəti olan müəssisə kimi “Norm” ASC-nin qlobal əhəmiyyət kəsb edən bu forumda iştirakına yer verilməsi şirkət üçün xüsusi əhəmiyyət kəsb edib və yüksək qiymətləndirilib. Öz stendi ilə forumda təmsil olunan müəssisə üçün xarici və yerli qonaqlara Norm Sement zavodunun fəaliyyətindən bəhs etmək imkanı yaranıb.
Qeyd edək ki, Norm Sement zavodunda sement istehsalı üçün müvafiq xammal yataqlarında hasilat işləri müasir üsullarla, normalara uyğun aparılır və şirkət bu sahədə yenilikləri daim diqqətlə izləyir.
“Norm” ASC 10-dan çox ölkədə enerji, telekommunikasiya, yüksək texnologiyalar və tikinti sahələrində fəaliyyət göstərən beynəlxalq şirkətlər qrupu olan NEQSOL Holding-in tərkibinə daxildir.
