Azərbaycanın tanınmış qadın sahibkarlarından olan “Bloom Group” marketinq agentliyinin təsisçisi, “Femmes Digitales” qadın klubunun həmtəsisçisi və idarə heyətinin üzvü Səbinə Pərvizi beynəlxalq biznes jurnalı “Forbes”un Almatıda keçirilən illik “Woman Club” forumunda Azərbaycanı uğurla təmsil edib.
Fins.az xəbər verir ki, S.Pərvizinin biznesin rəqəmsallaşması, qadın liderliyinin inkişafı, ChatGPT və süni intellektdən istifadə, onun faydalı və zərərli tərəfləri mövzularında çıxışları iştirakçılar tərəfindən maraqla qarşılanıb.
Qeyd edək ki, Səbinə xanım müxtəlif ölkələrdən, o cümlədən Azərbaycan, Qazaxıstan və Qırğızıstandan olan uğurlu iş qadınlarını bir araya gətirən tədbirə ölkəmizdən dəvət olunan yeganə iştirakçıdır.
O, öz çıxışında kiçik və orta biznesin inkişaf etməsi, biznesin genişlənməsi və ölkə sərhədlərindən kənara çıxması üçün rəqəmsallaşmanın önəmindən danışıb, həmçinin KOB- ların rəqəmsallaşma səviyyəsini artırmaq üçün dövlət dəstəyinin zəruriliyini qeyd edib.
“Pandemiya dövründə rəqəmsallaşmanın zəruriliyini daha aydın gördük. Biz “Bloom Group” olaraq məhz rəqəmsallaşmanın hesabına həmin gərgin dövrü geridə qoya bildik və hətta müəyyən uğurlar əldə etdik. O zaman biz ölkədə ilk dəfə tədbirləri onlayn təşkil etməyə başladıq və bu, uğurlu oldu, nəticə etibarilə təkcə bir il ərzində 100-dən çox onlayn tədbir keçirdik. Məhz rəqəmsallaşma sayəsində bütün problemlərdən çıxış yolu tapdıq və çətinlikləri geridə qoyduq.
Biz bilirik ki, rəqəmsallaşma olmadan inkişaf mümkün deyil. Odur ki, rəqəmsallaşmanın önəmini nəzərə alaraq, biz “Femmes Digitales” olaraq Azərbaycan xanımlarının informasiya-kommunikasiya texnologiyaları sahəsinə cəlb edilməsinə çalışırıq. Bunun üçün biz regionlarda məktəbli qızlarla görüşür, onlara rəqəmsəmsallaşma ilə bağlı məlumat verir və onları İT sahəsində karyera qurmağa həvəsləndiririk”, - deyə Səbinə Pərvizi vurğulayıb.
Bundan başqa, “Bloom Group” marketinq agentliyinin təsisçisi və direktoru olaraq Səbinə xanım qadın liderliyinin inkişafı mövzusunda öz təcrübələrini bölüşüb.
“Mən əminəm ki, gələcək qadın liderlərindir. Çünki empatiya indi çox vacibdir və bu qadınlarda daha çox inkişaf edib. Biz mütləq emosional intellekti inkişaf etdirməli, onun üzərində işləməliyik. Bu, qadın liderlərin daha da artmasına nail olmaqda bizə kömək edəcək. Yeri gəlmişkən bildirim ki, Azərbaycanda müxtəlif sahələrdə, o cümlədən də İT-də qadın liderlərin sayı hər il artır. Azərbaycan bu sahədəki təcrübələrini digər ölkələrdə bölüşməyə hazırdır”, - deyə azərbaycanlı sahibkar xanım qeyd edib.
İş-həyat balansının müzakirəsi zamanı isə o bildirib ki, qadınlar üçün ideal tarazlığı saxlamağın çox çətin olduğu müasir dünyada cəmiyyət cəmiyyət və dövlət qadınlara dəstək olmalıdır.
Yekun olaraq, sual-cavab sessiyasında müasir dövrün ən aktual mövzusu – Süni intellektdən istifadə müzakirə olunub. Səbinə xanım rəhbərlik etdiyi “Bloom Group” marketinq agentliyində ChatGPT-dən istifadə olunması ilə bağlı öz təcrübələrini bölüşüb.
“Biz reallıqlara və tendensiyalara uyğunlaşır və öz fəaliyyətimizdə süni intellektdən istifadə edirik. Bu, vaxta və insan resurslarına qənaət etməyə kömək edir. Komandam öz bilikləri və süni intellekt sayəsində indi daha çox iş görür. Bu da bizə rəqabətqabiliyyətli qalmağa imkan verir”, - deyə Səbinə Pərvizi qeyd edib.
Fuad Mədətov
Fins.az
