Cari ilin altı ayı ərzində ölkədə 38,9 min yeni iş yerləri açılıb. Bu dövrdə yaradılmış iş yerlərinin 93,4 faizi qeyri-dövlət sektorunda açılıb.

Dövlət Statistika Komitəsindən Fins.az-a bildirilib ki, yeni açılmış iş yerlərinin 81,9 faizi Bakı şəhərinin, 1 faizi Naxçıvan Muxtar Respublikasının, 17,1 faizi digər regionların, o cümlədən 3,2 faizi Abşeron-Xızı, 2,6 faizi Quba-Xaçmaz, 1,9 faizi Gəncə-Daşkəsən, 1,5 faizi Mərkəzi Aran, 1,5 faizi Şəki-Zaqatala, 1,4 faizi Qazax-Tovuz, 1,2 faizi Qarabağ, 1 faizi Şərqi Zəngəzur, 1 faizi Şirvan-Salyan, 0,8 faizi Lənkəran-Astara, 0,6 faizi Mil-Muğan, 0,4 faizi isə Dağlıq Şirvan iqtisadi rayonlarının payına düşüb. Yeni açılmış iş yerlərinin 9,1 faizi yeni yaradılmış müəssisə və təşkilatlarda, 90,1 faizi mövcud müəssisə və təşkilatlarda, 0,5 faizi fəaliyyətini bərpa etmiş müəssisə və təşkilatlarda, 0,3 faizi isə digər tədbirlər üzrə yaradılıb.

Hüquqi şəxslər tərəfindən yaradılmış iş yerlərinin 25 faizi tikinti, 18,3 faizi ticarət; nəqliyyat vasitələrinin təmiri, 10,1 faizi emal sənayesi, 9 faizi turistlərin yerləşdirilməsi və ictimai iaşə, 7,1 faizi peşə, elmi və texniki fəaliyyət, 5,3 faizi nəqliyyat və anbar təsərrüfatı, 4,8 faizi əhaliyə səhiyyə və sosial xidmətlərin göstərilməsi, 4,7 faizi inzibati və yardımçı xidmətlərin göstərilməsi, 3,2 faizi kənd təsərrüfatı, meşə təsərrüfatı və balıqçılıq, 2,5 faizi informasiya və rabitə, 10 faizi isə digər iqtisadi fəaliyyət növləri üzrə açılıb.

Bununla yanaşı, 2023-cü ilin birinci yarımili ərzində ölkədə 8,1 min iş yeri bağlanıb. Bu dövrdə bağlanmış iş yerlərinin 48,1 faizi qeyri-dövlət sektorunun payına düşüb. İş yerlərinin 54,0 faizi müəssisə və təşkilatların fəaliyyətlərinin dayandırılması, 46 faizi isə fəaliyyət göstərən müəssisə və təşkilatlarda aparılan ixtisarlar ilə əlaqədar bağlanıb.