“Cahan Holding”-in qurucusu, Naxçıvan Sahibkarlar Konfederasiyasının sədri Vüqar Abbasov Ulu öndər Heydər Əliyevin 100 illiyinə həsr edilmiş tədbirdə iştirak edib.
Fins.az xəbər verir ki, aprelin 25-də dahi lideri Heydər Əliyevin 100 illiyinə həsr olunmuş “"Heydər Əliyev və Azərbaycanda sahibkarlığın inkişafı" adlı tədbir keçirilib. Azərbaycan Respublikası İqtisadiyyat Nazirliyi, Azərbaycan Respublikası Kiçik və Orta Biznesin İnkişafı Agentliyi (KOBİA) və Azərbaycan Sahibkarlar Konfederasiyasının birgə təşkil etdiyi tədbirdə Azərbaycan və Naxçıvan sahibkarlarının təmsilçisi olaraq “Cahan Holding”in qurucusu və Naxçıvan Sahibkarlar Konfederasiyasının sədri Vüqar Abbasov, həmçinin “Cahan Holding”ə daxil olan şirkətlərin rəhbərliyi də iştirak edib.
Tədbirdən öncə iştirakçılar fəxri xiyabanda Ulu öndər Heydər məzarını ziyarət edib, abidəsinin önünə əklil qoyub, gül düzüblər. Daha sonra onlar fəxri xiyabanı ziyarət ediblər.
Azərbaycan Respublikasının himni və İkinci Qarabağ Müharibəsi şəhidlərinin əziz xatirəsini bir dəqiqəlik sükutla yad edərək başlanan tədbirdə Prezidentin sosial-iqtisadi məsələlər üzrə köməkçisi Xalid Əhədov, İqtisadiyyat naziri Mikayıl Cabbarov, Əmək və Əhalinin Sosial-Müdafiə naziri Sahil Babayev, İqtisadiyyat nazirinin müavini Sahib Ələkbərov, KOBİA-nın İdarə heyətinin sədri Orxan Məmmədov, Azərbaycan Sahibkarlar Konfederasiyasının sədri Məmməd Musayev və digər dövlət adamları çıxış edərək Ulu öndər Heydər Əliyevin Müasir Azərbaycanın iqtisadiyyatının formalaşmasında önəmli faktor olan sahibkarlığın inkişafı sahəsində gördüyü işlərdən və Azərbaycanın iqtisadi durumu barədə məlumat veriblər.
Tədbirdə həmçinin tamaşaçılara Heydər Əliyevin fəaliyyətini işıqlandıran “Əbədiyyətin ilk əsri. Heydər Əliyev 100” filmi nümayiş olunub.
Tədbir barədə Vüqar Abbasov bunları deyib, “Azərbaycanda dövlət quruculuğunun, iqtisadi dirçəlişin, sosial-siyasi həyatda tərəqqinin Ümummilli lider Heydər Əliyevin adı ilə bağlı olduğu kimi, ölkəmizdə sahibkarlığın inkişafındakı rolu da danılmaz faktdır. Heydər Əliyev deyirdi: “Sahibkarlığın inkişaf etdirilməsi, sərbəst iqtisadiyyata yol verilməsi, bazar iqtisadiyyatının yaradılması bizim strateji yolumuzdur!” Azərbaycanın bugünkü iqtisadi inkişafı məhz Heydər Əliyevin gördüyü işlərin və onun miras qoyduğu və möhtərəm prezidentimiz İlham Əliyevin uğurla davam etdirdiyi siyasətinin nəticəsidir.”
Tədbir bədii proqram və qonaqların fərdi görüşləri ilə davam edib.
